2025 елда машина йөртү таныклыгын алыштыруда үзгәрешләр булачак
Россиядә 2025 елда машина йөртү таныклыкларының гамәлдә булу вакыты автомат рәвештә озайтылу дәвам итә. Бу хакта «Алдынгы Түләү Чаралары» компаниясенең «Штрафлар» продукты эксперты Галина Андросенко искәртте, дип хәбәр итә RuNews24 басмасы.
Сүз 2025 елның 31 декабренә кадәр гамәлдә булган машина йөртү таныклыклары турында бара. Алар тагын өч ел дәвамында гамәлдә булачак.
Шулай ук барлык үзгәрешләр Дәүләт автоинспекциясе базасында электрон рәвештә күрсәтеләчәк, дип сөйләде Андросенко «Южный федеральный»га. Таныклыкларны өч елдан соң (бу вакыт машина йөртү таныклыгының гамәлдә булу вакыты тәмамлану датасыннан башлап исәпләнә) алыштырырга кирәк булачак.
Белгеч таныклыкның гамәлдә булу вакытын автомат рәвештә озайту мөмкинлеге барлык машина йөртүчеләргә дә бирелмәячәк, дип ассызыклады. Шәхси мәгълүматлары үзгәргән, шулай ук таныклык кәгазенә зыян килгән автомобильчеләр мондый мөмкинлектән файдалана алмаячак.
Шулай ук таныклык кәгазе югалган яки урланган, вакыты чыккан документлар нигезендә рәсмиләштерелгән, шулай ук машина йөртүчедә автомобиль белән идарә итү мөмкинлеген чикли торган медицина күрсәтмәләре расланган очракта да таныклыкны алыштырырга кирәк була.
Машина йөртү таныклыгын вакытында алыштырмаган өчен 5-15 мең сум күләмендә штраф яный. Шулай ук бу иминиятләштерү рәсмиләштерү белән проблемаларга китерергә мөмкин. Моннан тыш, машина йөртүчене автоинспектор туктатып, таныклыкның вакыты чыкканынлыгы ачыкланса, машина йөртүчегә янәдән таныклык алу өчен барлык этапларны яңадан узарга кирәк булачак, дип билгеләде эксперт.