Бензин алу мөмкинлеге буенча Татарстан Идел буе федераль округында беренче урында
Татарстан Республикасы бензин алу мөмкинлеге буенча Россия төбәкләре рейтингында 26нчы урынны алган. Бу хакта РИА Новости үткәргән тикшеренүдә белдерелә.
Татарстан халкы хезмәт хакына айга уртача 1188 литр Аи-92 маркалы ягулык сатып ала ала.
Рейтинг башында Мәскәү тора, башкала халкы 2421 литр бензин сатып алырга мөмкин. Икенче урында Ямал-Ненец автономияле округы (айга 2414 литр), өченче урында Чукотка автономияле округы (2296 литр) тора.
Идел буе федераль округында Татарстан Россия субъектлары арасында бензин алу мөмкинлеге буенча лидер булды. Икенче урында Пермь крае, өчлекне Самара өлкәсе төгәлли.