Ана капиталын тотуның иң популяр максаты билгеле

Программа гамәлгә куелганнан бирле Татарстанда 427 меңнән артык гаилә ана капиталына сертификатлар рәсмиләштергән, ә 400 мең гаилә бу акчаны кулланган инде. Бу хакта «Татар-информ»га интервьюсында Россия Социаль фондының Татарстан буенча бүлеге идарәчесе Эдуард Вафин сөйләде.

«Иң популяр юнәлеш — торак шартларын яхшырту. Моннан 320 мең гаилә файдаланган. Шулай ук күпләр бу акчаны балаларының белем алуына тота. Татарстанда андый гаиләләр 48 меңнән артык. Айлык түләүне сайлаучылар да бар - бу 27 мең гаилә», - дип сөйләде ул.

Моннан тыш, узган елдан сертификатта 10 мең сум яки аннан азрак калган гаиләләр бу акчаны алырга мөмкин. Бу мөмкинлектән 4 мең гаилә файдаланган инде.

Быел «Демография» илкүләм проектына алмашка «Гаилә» яңа илкүләм проекты киләчәк. Аңа «Гаиләгә ярдәм итү», «Өлкән буын», «Аналарны һәм балаларны саклау» кебек программалар кергән.