Үзәк банкка купюраларга Россия флагын кире кайтарырга тәкъдим иттеләр
Россия Банкына купюраларга төп дәүләт символларыннан берсе буларак флагны кире кайтарырга тәкъдим иттеләр. Социаль-икътисади анализ һәм программалар үсеше институты Үзәк банк рәисе Эльвира Нәбиуллина адресына шундый мөрәҗәгать белән чыкты, дип хәбәр итә РИА Новости агентлыгы.
«Акча билгеләренең илебезнең бөтен территориясе буйлап кулдан-кулга күчеп йөрүен һәм гаять зур пропаганда потенциалына ия булуын исәпкә алып, Россия Федерациясе дәүләт гербы белән беррәттән, дәүләтнең төп өч символының берсе буларак, анда Россия дәүләт флагын да мәҗбүри кертүне карарга тәкъдим ителә», - диелә институт директоры Андрей Шуриков тарафыннан имзаланган хатта.
Мөрәҗәгатьтә акча билгеләренең дәүләтнең визит карточкасы булуы билгеләп үтелә. Шул исәптән алар аның мәдәниятен, традицияләрен һәм тарихын да чагылдыра. Шуңа күрә акчага төшерелгән сурәтләрнең эчтәлеге зур әһәмияткә ия.