Самараның «Яктылык» мәктәбендә Каюм Насыйриның 200 еллыгын билгеләп үттеләр
12 февраль көнне Самараның «Яктылык» мәктәбендә күренекле татар галиме, мәгърифәтче һәм язучы Каюм Насыйрига багышланган тантаналы чара узды. Бу хакта Каюм Насыйри институты матбугат хезмәте хәбәр итә.
Чара Самара шәһәрендәге Каюм Насыйри институтының мәгариф-мәдәни үзәге методисты Рәхимә Хәйрова җитәкчелегендә узды. 2 нче һәм 4 нче сыйныф укучылары бай эчтәлекле программа әзерләделәр: алар татар телендә җырлар башкардылар, бөек галимнең тормышы һәм казанышлары турында сөйләделәр. Аның мәгарифкә һәм мәдәнияткә керткән өлешенә аерым игътибар бирелде. Каюм Насыйри фәнни хезмәтләр язып кына калмый, белемнәрен һәркемгә җиткерергә тырышып, белем бирү белән дә актив шөгыльләнә.
Фото: © Каюм Насыйри институты матбугат хезмәте
Мондый чаралар буыннар бәйләнешен ныгытып кына калмый, балаларны туган телне һәм гореф-гадәтләрне өйрәнергә дә дәртләндерә.
Чарага мәртәбәле кунаклар чакырылган иде, алар арасында – «Дуслык» татарлар берләшмәсе директоры Эльмира Мурхабинова, «Туган тел» иҗтимагый оешмасы вәкиле Фәһим Йосыпов һәм «Самара шәһәре татар милли-мәдәни автономиясе» рәисе Илназ Шәкүров. Чара ахырында алар Каюм Насыйри хезмәтләренең татар халкы өчен зур әһәмияткә ия булуын ассызыкладылар. Аның хезмәтләре фәнне баетып кына калмыйча, татар телен саклап калуга һәм үстерүгә дә ярдәм итә. Кунаклар билгеләп үткәнчә, мондый чаралар яшьләрне тәрбияләүдә мөһим роль уйный. Алар балаларга үзләренең бай мәдәнияткә каравын аңларга ярдәм итәләр, аларны үз тамырлары белән горурланырга һәм белемгә омтылырга өйрәтәләр.
Фото: © Каюм Насыйри институты матбугат хезмәте