Россиялеләргә чит ил паспортыннан башка барып була торган илләрне атадылар

Россиялеләргә РФ эчке паспорты белән барып була торган илләрне атадылар. Исемлеккә Россия Федерациясе белән күршедәш алты ил кергән.

Әйтик, Абхазиягә бару өчен Россия паспорты (14 яшькә кадәрге балаларга туу турында таныклык) гына кирәк. Илдә теркәлмичә 90 көнгә кадәр калырга була.

Әрмәнстанга, авиаочыш ысулын кулланган очракта, эчке паспорт белән барырга мөмкин. Чикне коры җир юлы белән кичкән очракта исә чит ил паспорты кирәк булачак. Илдә теркәлмичә утыз көнгә кадәр (теркәлгән очракта 180 көнгә кадәр) калырга мөмкин.

Казахстанда россиялеләргә шулай ук миграцион карта тутырырга кирәк була. Россиялеләр илдә теркәлмичә утыз көнгә кадәр кала ала.

Беларусь, Көньяк Осетия һәм Кыргызстанга бару өчен дә Россия эчке паспорты гына кирәк. Теләсә нинди транспорт төре белән килергә була. Беларусь һәм Көньяк Осетиядә теркәлмичә 90 көнгә калырга ярый, ә Кыргызстанда – утыз көнгә кадәр.

Экспертлар сәфәр планлаштырыр алдыннан илгә килү һәм анда торуның актуаль шартларын ачыкларга киңәш итә, чөнки алар үзгәрергә мөмкин. Шулай ук илнең законнарын һәм традицияләрен үтәү мөһим.