Миңнехановтан Казан балалар бакчаларын ремонтлау программасын кабул итүне сорадылар
Бүген Татарстан башкаласында 188 балалар бакчасы бинасы капиталь ремонтка мохтаҗ, бу барлык бакчаларның яртысыннан артыгы дигән сүз. Депутат Людмила Андреева Казан шәһәре Думасының хисап сессиясендә шулай дип белдерде, дип яза «Татар-информ».
Аның сүзләренчә, шәһәрдә 54 балалар бакчасы авария хәлендә, тагын уникесе ябык. Ул билгеләп үткәнчә, соңгы ун елда өстәмә белем бирү учреждениеләренә бер генә ремонт та үткәрелмәгән һәм 12 шундый учреждение инде ябылу алдында тора.
Шуңа бәйле рәвештә, депутат Татарстан Рәисе Рөстәм Миңнехановка балалар бакчаларын һәм өстәмә белем бирү учреждениеләрен капиталь ремонтлау программаларын кабул итүне, шулай ук мәктәпләрне төзекләндерү программасын озайтуны сорап мөрәҗәгать итте.
Үз чиратында, Рөстәм Миңнеханов әлеге проблемаларның барысы да хәл ителәчәген, әмма моның тиз булачагын көтәргә кирәкми дип әйтте.
«Сез шуны аңларга тиеш, бүген махсус хәрби операция бара, һәм бөтен ил, шул исәптән безнең республика да, илнең оборона сәләте белән бәйле бурычларны хәл итү юнәлешендә эшләргә тиеш», - диде ТР Рәисе.
«Кайбер әйберләрне бераз көтәргә яки бераз сузарга туры киләчәк, шуңа күрә хәлне аңлавыгызны сорыйм», - дип сүзен төгәлләде Рөстәм Миңнеханов.