Владимир Путин көнбатыш брендларының Россиягә кайтуына җавап бирергә тәкъдим итте

РФ Президенты Владимир Путин РФ Хөкүмәтенә, әгәр чит ил көндәшләре Россия базарына кайтырга карар кылса, үзебезнең ил җитештерүчеләренә өстенлекләр бирергә кушты. Әмма дәүләт башлыгы барлык өстенлекләр Бөтендөнья сәүдә оешмасы таләпләрен үтәп бирелергә тиешлеген билгеләп үтте. Россия лидеры Киләчәк технологияләре форумының пленар сессиясендә шулай дип белдерде.

«Хөкүмәт илкүләм җитештерүчеләргә билгеле бер өстенлекләр бирү өчен безнең предприятиеләр һәм көндәшләребез предприятиеләренең үзара хезмәттәшлеген ничек җайга салу турында уйлансын иде. Әйе, Бөтендөнья сәүдә оешмасы кысаларында», - диде ул.

Путин билгеләп үткәнчә, Көнбатыш җитештерүчеләре россиялеләргә кайбер кыенлыклар тудырды. Һәм Россия аларның үз базарына кайтуын тиешенчә җайга салырга, ягъни үз җитештерүчеләренә өстенлек бирергә мөмкин. Моны һичшиксез, әмма бик җентекләп эшләргә кирәк, дип өстәде Президент.

Ул бу мәсьәлә турында беренче вице-премьер Денис Мантуров белән фикер алышканын искәртте. Россия лидеры шулай ук, Путин бу теманы яңадан күтәргәч, Мантуровның баш кагып куюына аудиториянең игътибарын юнәлтте.