Татарстанда Җиңүнең 80 еллыгы юбилей медальләрен 1 апрельгә кадәр тапшырачаклар

Татарстанда Ватанны саклаучылар елы һәм Бөек Ватан сугышында Җиңүнең 80 еллыгы кысаларында патриотик акцияләр, чаралар һәм Хәрби дан көннәре узачак. Бу хакта бүген Казанда узган брифингта Татарстан Республикасы Премьер-министры урынбасары Ләйлә Фазлыева хәбәр итте.

«Иң мөһим эш – Бөек Ватан сугышында Җиңүнең 80 еллыгына багышланган чараларны әзерләү, оештыру һәм уздыру була. Шундый вакыйгаларның берсе – Россия Президенты Владимир Путин гамәлгә куйган юбилей медальләрен тапшыру. Медальләрне тапшыра башладылар инде. Бу эш 1 апрельгә кадәр дәвам итәчәк», - дип хәбәр итте ул.

ТР Хезмәт министрлыгы матбугат хезмәте мәгълүматларына караганда, барлыгы 7,8 меңнән артык медаль тапшыру планлаштырыла. Бүгенге көнгә 2,7 меңнән артык медаль тапшырылган инде.

Республикада шулай ук Бөек Ватан сугышында катнашучыларның барысына Мактаулы гражданин исемен бирү эше алып барыла. Бүгенгә әлеге исем белән 146 фронтовик бүләкләнгән.