ЗАГС Татарстан халкының гражданлык хәле актларын теркәү турында белешмәне 100 ел саклый

Татарстан халкының гражданлык хәле актларын теркәү турындагы белешмәләр ЗАГСларда, архив учреждениеләренә тапшырылганчы, 100 ел дәвамында саклана. Россиядә 10 мартта билгеләп үтелә торган Архивлар көнендә Татарстан Министрлар Кабинетының ЗАГС идарәсендә архив мәгълүматларын саклауның әһәмияте турында сөйләделәр.

«Архивлар көне ЗАГС хезмәткәрләре өчен әһәмиятле, чөнки аларның эшчәнлеге архив документлары белән тыгыз бәйләнгән. Гражданлык хәле актларын теркәү кенәгәләре һәр көнне яңа язмалар белән тулыландырыла, 1926 елдан башлап, архив учреждениеләренә тапшырылганчы, 100 ел дәвамында ЗАГСларда саклана. ЗАГС һәр кеше тормышындагы иң мөһим вакыйгаларны терки. Гражданлык хәле актларын теркәү кенәгәләрендә кеше тормышындагы барлык мөһим этаплар турында мәгълүмат бар. Аларда гаилә тарихы чагыла, ә алардан дәүләт тарихы төзелә», - дип хәбәр иттеләр ТР Министрлар Кабинеты ЗАГС идарәсе матбугат хезмәтендә.

Архив фондын алып баручы ЗАГС белгечләре язмаларны исәпкә алу, эшкәртү, саклау һәм актуаль хәлдә тоту буенча зур тырышлык куя. «Безнең бурыч - үткәнгә сакчыл карау, бүген намуслы хезмәт итү һәм документларны киләчәк буынга тапшыру», - диделәр матбугат хезмәтендә.