Рәфыйк Мөхәммәтшин Россия Президенты Рәхмәт хатына лаек булды
Россия ислам институты ректоры, Татарстан мөфтие урынбасары, Ислам мәгарифе советы директоры Рәфыйк хәзрәт Мөхәммәтшинга Россия Президенты Владимир Путинның Рәхмәт хаты тапшырылды.
Рәфыйк Мөхәммәтшин башка дин һәм җәмәгать эшлеклеләре арасында «Россия Федерациясе Президенты каршындагы дини берләшмәләр белән хезмәттәшлек Советы эшчәнлеген тәэмин итүгә керткән өлеше өчен» билгеләп үтелде. Дәүләт башлыгының бу карары хокукый актларны рәсми бастырып чыгару порталында урнаштырылган.
Шул ук карар белән Россия мөселманнарының Үзәк Диния нәзарәте рәисе, Баш мөфти Тәлгать хәзрәт Таҗетдин, Мәскәү патриархатының чиркәүнең җәмгыять һәм массакүләм мәгълүмат чаралары белән үзара мөнәсәбәтләре буенча Синодаль бүлеге рәисе Владимир Легойда һәм Санкт-Петербург дәүләт университеты ректоры Николай Кропачев РФ Президентының Мактау грамоталары белән бүләкләнде.