Алма-Ата янында җир тетрәү булган
Казахстанда Алма-Атадан тугыз чакрым ераклыкта җир тетрәү булган. Бу хакта ТАСС хәбәр итә.
Казахстан Гадәттән тыш хәлләр министрлыгында тетрәүләр сейсмик станцияләр челтәре тарафыннан 21 сентябрьдә Астана вакыты буенча 16.25 сәгатьтә (Мәскәү вакыты белән 14.25) теркәлгән, дип ачыклык керттеләр. Эпиүзәк Казахстан территориясендә, шәһәрдән тугыз километр көньяк-көнбатыштарак булган.
Билгеләп үтелгәнчә, җир тетрәү сизелмичә узган, җимерелүләр һәм зыян күрүчеләр турында мәгълүмат килмәгән.
Алма-Атада яшәүчеләргә җир асты тетрәүләре турында кисәтү һәм өйдән чыгып китү үтенече белән SMS-белдерү килгән. Сизелерлек тирбәнешләр булмауга карамастан, шәһәр кешеләренең бер өлеше урамга чыккан.