Альберт Гыйльметдинов: Рәис исеменнән Кытай партнерларыбызга ике тәкъдим ясадык

Евгений Завойский исемендәге халыкара премияне быел Кытай мәгариф министры урынбасары Ду Цзянфэн алды, тантана алдыннан ул Татарстан рәисе Рөстәм Миңнеханов белән очрашты. Республика җитәкчесе ярдәмчесе Альберт Гыйльметдинов «Татар-информ» хәбәрчесенә Татарстан Республикасы Рәисенең Кытай партнерларына нәрсә тәкъдим итүе турында сөйләде.

«Рәис янында булганда, Рәис исеменнән без Кытай партнерлары белән хезмәттәшлек турында ике тәкъдим ясадык. Беренче җитди тәкъдим Россия һәм Кытайның техник университетлары Ассоциациясенә кагыла», – дип аңлатты Гыйльметдинов.

Бүген әлеге ассоциациягә 80нән артык университет керә һәм киләсе елга ул 15 еллык юбилеен уздырачак. Бу чараны бик киң итеп оештыру, тик иң мөһиме, аны Казанда уздыру планлаштырыла. Бу бәйрәмгә ассоциациягә кергән университетлар башлыкларын чакырырга, шулай ук фәнни казанышлар күргәзмәсе үткәрергә телиләр.

«Күз алдына китерәсезме, әгәр безнең шәһәргә дөньяның әйдәп баручы университетларының 80 башлыгы килсә? Бу бик җитди булачак», – диде Гыйльметдинов.

Икенче тәкъдим Кытай партнерлары белән үзара элемтә төзи торган университетларга кагыла. Гыйльметдинов сүзләренчә, бүген һәр югары уку йорты моны «үзенчә» эшли, шул сәбәпле, «Россия-Кытай перспектив технологияләр университеты челтәрен» булдыру зарур.

«Синергия нәтиҗәсе булсын, төрле активлыклары бер-берсен көчәйтсен, бер-берсенә ярдәм итсен өчен моны ничек эшләргә икәнен уйлашырбыз», – дип аңлатты Рәис ярдәмчесе.

Гыйльметдинов сүзләренчә, Кытай коллегалары ике тәкъдимне дә кызыксынып тыңлаган, әмма ахыргы карар әлегә кабул ителмәгән. «Алга таба эш алып барырга килештек, әмма моннан нәрсә килеп чыгачагын карарбыз», – диде агентлык әңгәмәдәше.

Бүген Татарстан Премьер-министры Алексей Песошин Кытай Халык Республикасының мәгариф министры урынбасары Ду Цзянфэнга магнит-резонанс спектроскопиясе нигезендә спин-квант технологияләре эшләнмәләрендә зур казанышлары өчен Евгения Завойский исемендәге премия тапшырды.