Сергей Миронов пенсияләрне квартал саен индексацияләүне хуплады

Пенсияләрне индексацияләү квартал саен үткәрелергә тиеш, югыйсә планлаштырылган 0,8 процент кебек аз гына артулар өлкән яшьтәге кешеләрне хәерчелеккә китерәчәк. Бу хакта Дәүләт Думасы депутаты Сергей Миронов әйтте. Аның сүзләрен «Газета.Ru» китерә.

Ул искәрткәнчә, 2026 елда ике этаплы индексация урынына (1 февральдән факттагы инфляция буенча һәм 1 апрельдән РФ Социаль фонды керемнәреннән чыгып) ул вакытыннан алда – 1 гыйнвардан 7,6 процент күләмендә, ягъни инфляция дәрәҗәсеннән югарырак үткәреләчәк.

Депутат сүзләренчә, берничә атна элек кенә Социаль фонд башлыгы ике этаплы схеманы саклау турында белдергән иде. Ләкин хәзер башка карар кабул ителде. Миронов билгеләп үткәнчә, вакытыннан алда инфляциядән югарырак индексация уңай адым булып тора, әмма «югарырак» арту бары тик 0,8 процентка гына булган, бу пенсиягә уртача 200 сумга якын өстәячәк.

Шул ук вакытта апрель индексациясе очрагында түләүләрнең ни дәрәҗәдә артачагы аңлашылмый. Социаль фонд керемнәренең беренче яртыеллыкта 6,8 процентка артуы гына билгеле. Шуңа бәйле рәвештә ике этаплы индексациядән баш тарту, депутат фикеренчә, әлегә сораулар тудыра.

Миронов шулай ук хөкүмәт тарафыннан тәкъдим ителгән вариант «артта кала торган индексация» проблемасын катлауландырачак, чөнки пенсияләр үсеше инфляциядән артта калуын дәвам итә, дип ассызыклады.

Ул пенсионерларның товарларны һәм хезмәтләрне реаль бәяләр буенча сатып алуларына игътибар итте, алар рәсми индексация теркәлгәнгә караганда тизрәк үсә.

Сәясәтче искәрткәчә, күптән түгел Президент белән очрашуда ул квартал саен индексация үткәрү мөмкинлеген карарга тәкъдим итте, ул бәяләрнең агымдагы үсешен исәпкә алыр иде.

Аның фикеренчә, мондый механизм инфляция өстәмәне «ашый» торган, ә пенсияләр күләме тормыш итү бәясеннән һәм хезмәт хакы дәрәҗәсеннән артта кала торган вазгыятьне булдырмаска мөмкинлек бирер иде.