3,5 мең вакыйга һәм миллион кеше: «Татарстанда җәй» проекты нәрсәсе белән истә калды?
«Республиканың төрле почмакларында бердәм онлайн-платформада 3,5 мең вакыйга булды»
Татарстан Республикасы Рәисе Рөстәм Миңнеханов тәкъдим иткән «Татарстанда җәй» проекты 1 июньнән сентябрьгә кадәр дәвам итте. Аның максаты – эчке туризмны үстерү һәм иҗтимагый киңлекләрне җанландыру. Проект вакыйгалары республиканың барлык 45 муниципалитетында узды.
Махсус «Татарстанда җәй» цифрлы платформасы булдырылды. Анда зур фестивальләрдән алып локаль мастер-классларга кадәр төрле вакыйгалар афишасы җыелган иде. Өстәвенә, мәнфәгатьләр һәм үткәрү урыны буенча чараны сайлап алырга мөмкин булды.
«Татарстанда җәй» масштаблы узды. Без республиканың төрле почмакларында бердәм онлайн-платформада 3,5 мең чара үткәрдек. Проект эшенә барлык 45 муниципалитет, министрлык һәм ведомстволар кушылды. Алар да вакыйгаларын ачык һавада «Айда гулять» хештегы белән уздырдылар, – дип сөйләде журналистларга ТР шәһәрләрен үстерү институтының вакыйгалар программасы кураторы Данил Данилов.
«Бу платформада бер миллионнан артык кулланучы булган, аларның 42 проценты – татарстанлылар һәм 58 проценты – Россиянең башка төбәкләрендә яшәүчеләр», - дип ассызыклады ул.
Фото: © Владимир Васильев / «Татар-информ»
«Проектны алга таба этәрә алырлык партнерлыкка тәкъдимнәр алдык»
«Проект шактый уңышлы, чөнки һәр чара – кечкенә ишегалды бәйрәменнән алып зур фестивальгә кадәр – платформада 10 меңнән артык «лайк» җыелды», - дип белдерде Данилов.
«Үз муниципалитетында һәр чарага килгән активистлар бар. Алар хәтта юл картасын төзеде һәм безнең сайт буенча булачак вакыйгаларны карады, мәсәлән, «Спорт» категориясендә. Бу проект буенча барысы да яхшы килеп чыкты. Без проектны алга таба этәрә алырлык кайтавазлар, партнерлыкка тәкъдимнәр алдык», - дип билгеләп үтте вакыйгалар программасы кураторы.
Проектның иң уңышлы чаралары дип ул Иван Купала бәйрәмен, ачык һавада VK Fest музыкаль-күңел ачу фестивален, пляж маркетын, Әлмәттә «Каракүз» этно-модерн-фестивален һәм Чаллыда ишегалды территориясен ачуны атады.
«Бу вакыйгаларда безнең бренд-зона тәкъдим ителде. Анда без Татарстан казанышлары турында сөйләдек, Россиянең теләсә кайсы ноктасына җибәрергә мөмкин булган котлау хатларын, шулай ук халык таныша алсын өчен җирле җитештерүчеләр продукциясен тараттык», – дип билгеләде Данилов.
Фото: «Күрше фест» матбугат хезмәте
«Конкурста катнашу өчен 585 гариза килде»
«Татарстанда җәй» проектының төп юнәлеше – яз ахырында старт алган «Күрше» фестивале. Ул «Безнең ишегалды» төзекләндерү республика программасының дәвамы булды һәм халыкны берләштерүгә юнәлдерелде.
«Проект кешеләрне күңел ачарга, бәйрәмнәрне күршеләре белән бергә уздырырга, якыннан танышырга чакыра», – дип ассызыклады Данилов.
«Безнең ишегалды» программасы гамәлдә булган биш ел эчендә республикада 5,1 меңнән артык күпфатирлы йортның ишегалды төзекләндерелгән. Татарстан Республикасы шәһәрләрен үстерү институтында хәбәр итүләренчә, «Күрше» фестивале программа кысаларын киңәйткән. Ягъни вакыйгалар программа буенча яңартылган яки төзекләндерү планнарына кертелгән ишегалларында гына түгел, ә Татарстанның күпфатирлы йортының теләсә кайсы ишегалдында да уза ала.
«Күрше» ишегалды вакыйгалары халык конкурсы республикада беренче мәртәбә уздырылды. Аның ярдәмендә Татарстанда 291 вакыйга үткәрелде, 80 меңнән артык кеше катнашты.
Данилов сүзләренчә, ишегалдының вакыйгалы программасын халыктан, идарәче оешмалардан, коммерциячел булмаган оешмалардан, кече бизнестан, территориаль иҗтимагый үзидарәләрдән 65 проект тәшкил иткән. Җиңүчеләр ким дигәндә өч вакыйга үткәрү өчен 500 мең сумга кадәр финанслау алды.
«Гомуми приз фонды – 20 млн сум. Барлыгы 65 җиңүче, аларның күбесе – халык, коммерцияле булмаган оешмалар. Конкурста катнашу өчен 585 гариза килде. Гаризаларның 65 проценты гади халыктан иде», - дип хәбәр итте вакыйгалар программасы кураторы.
Фото: «Күрше фест» матбугат хезмәте
«Халык үз ишегалларын аралашу үзәкләренә әйләндереп җанландыра белә»
«Күрше» фестиваленең кайбер җиңүчеләре 15-20 ишегалды бәйрәме оештырды. Лаеш районында рекордчы бар, ул 25 чара үткәргән, - дип сөйләде Данилов.
«Фестиваль җиңүчеләренең кызыклы кейслары булды. Мәсәлән, МХО катнашучылары ярдәме белән, кешеләр җыелып маскировка челтәрләре үрде. Халык катнашында театральләштерелгән спектакльләр куелды, бәйрәмнәрдән – Карбыз көне, Посейдон көне үткәрелде. Сигез муниципалитетка театр куяр өчен барып кайткан җиңүче бар», - дип белдерде ул.
Фестиваль кысаларында Чаллыда 46 чара узды, Алабуга районында – 29 вакыйга. Казанда – 27, Лаеш районында – 26, Түбән Камада – 16, Әгерҗедә – 14 ишегалды бәйрәме үткәрелде. Әлмәт һәм Балык Бистәсе районнарында тугыз чара үткәрелде.
Фото: © «Татар-информ»
Иң массакүләм чара Чаллыда узды. Мәсәлән, 1970 елларда «КамАЗ» заводы янында шәһәр халкы гармунга биергә һәм җырларга җыела торган булган. «Шәһри Чаллы» газетасы әлеге «Пятачок» бәйрәмен яңартты. «Аларның чарасына 18 меңнән артык кеше килгән», - дип хәбәр итте ТР шәһәрләрен үстерү институты.
«Күрше» фестивале төзекләндерелгән ишегалды территориясе генә түгел. Бу күршелек, очрашу һәм иҗат итү урыны. «Татарстанда җәй» проектының бер өлеше буларак һәм Татарстан Республикасы Рәисе Рөстәм Миңнеханов ярдәме белән фестиваль иң мөһим әйберне ачыклады – халык үз ишегалларын аралашу, иҗат һәм үзара хөрмәт үзәкләренә әйләндереп җанландыра белә», – дип проект нәтиҗәләрен бәяләде Татарстан Республикасы Премьер-министры урынбасары Ләйлә Фазлыева.
Надежда Гордеева, «Татар-информ»