Пенсионерларга өстәмә түләүне минималь хезмәт хакы дәрәҗәсенә кадәр арттырырга мөмкиннәр

Леонид Слуцкий җитәкчелегендәге Дәүләт Думасы депутатлары һәм сенаторлар 80 яшьтән өлкәнрәк гражданнарның һәм I төркем инвалидларның пенсияләренә өстәмә түләүне минималь хезмәт хакы күләме дәрәҗәсенә кадәр арттыру турында закон проекты кертте. Бу хакта «ТАСС» хәбәр итә.

Россиядә 2025 елдан 80 яшьтән өлкәнрәк гражданнарның һәм I төркем инвалидларның пенсияләренә карау өчен өстәмә түләү кертелде. Моңа кадәр мондый түләүләрне пенсионерларны һәм инвалидларны караучы кешеләр генә ала иде. Хәзерге вакытта өстәмә түләү күләме аена 1 200 сум тәшкил итә.

Закон проекты өстәмә түләүне минималь хезмәт хакы дәрәҗәсенә (2026 елда 27 093 сум) кадәр арттырырга тәкъдим итә. Аңлатма язуында билгеләп үтелгәнчә, өстәмә түләү пенсионерны караучы кеше булуга бәйле түгел, пенсионерлар бу акчаларны үзләре куллана алачак. Шулай ук документ өлкән яшьтәге кешеләрне яки инвалидларны караучы кешеләр өчен өстәмә шартлар кертми.

Инициатива авторлары өстәмә түләүне арттыру 80 яшьтән өлкәнрәк гражданнарның һәм I төркем инвалидларның финанс хәлен яхшыртачак һәм өлкән яшьтәге кешеләрне һәм инвалидларны караучы кешеләрнең хезмәт эшчәнлеген дәвам итү мөмкинлеген саклап калачак, дип саный.