Эпидемиолог Нипах вирусы куркынычы турында сөйләде
Эпидемиолог, Россия Фәннәр академиясе академигы, Гамалея исемендәге эпидемиология һәм микробиология тикшеренү үзәгенең фәнни җитәкчесе Александр Гинцбург Нипах вирусының ни өчен куркыныч булуын аңлатты, дип яза РИА Новости.
«Нипах вирусы аеруча куркыныч инфекцияләр кузгатучылар рәтенә керә. Асылда, аннан дару юк. Шуңа күрә терелү кешенең иммунитетына бәйле. Әгәр иммунитет зәгыйфь булса, авыру сепсис, ике яклы үпкә ялкынсынуы, менингит белән яный. Һәм бу чыннан да үлемгә китерергә мөмкин», - дип сөйләгән Гинцбург.
Ул шулай ук билгеләп үткәнчә, Россия һәм Һиндстан арасында актив авиаэлемтә аркасында Нипаханың безнең илгә эләгүнең реаль куркынычы бар.
Гинцбург әйтүенчә, Нипаха аркасында зур эпидемия теркәлмәгән, әмма гасырның соңгы чирегендә Һиндстанда һәм Көньяк-Көнчыгыш Азиядә вакыт-вакыт авырулар арта. Шуның нәтиҗәсендә дистәләгән кеше һәлак була.
Нипах ярканатлар һәм тычканнар аша тарала. Кешеләр гадәттә бу вирус белән зарарланган хайван төкереге эләккән җиләк-җимешләрне ашап авырый. Шулай ук вирус йорт хайваннарына да йога ала, диелә хәбәрдә.