«Ак Барс» үз бозында Уфа хоккейчыларына оттырды

Бүген Казанның «Ак Барс» хоккейчылары Уфаның «Салават Юлаев» командасына 3:4 исәбе белән җиңелде. Уен Казанда узды.

Беренче периодның дүртенче минутында Шелдон Ремпал алканы «Ак Барс» капкасына кертте, исәп ачылды (0:1). Унөченче минутта Александр Барабанов исәпне тигезли алды (1:1).

Икенче периодның икенче минутында Денис Ян яңадан Уфа командасын алга чыгарды (1:2). Унҗиденче минутта «Салават Юлаев» һөҗүмчесе Владислав Ефремов гол кертте (1:3).

Өченче периодның унынчы минутында, «Ак Барс» күпчелектә уйнаганда, Илья Сафонов Казан командасының артка калышуын киметә алды (2:3). Период азагында «Ак Барс» капкачысын алтынчы мәйдан уенчысына алмаштырды һәм, гол кертеп, исәпне яңадан тигезли алды. Голны Илья Сафонов кертте (3:3).

Өстәмә вакыт – овертаймның соңгы минутында «Салават Юлаев» уенчысы Егор Сучков гол кертте һәм командасына җиңү китерде (3:4).

Командалар составы:

«Ак Барс»

• Арефьев (Билалов);
• Барабанов – Сафонов – Галимов, Лямкин – Миллер;
• Хмелевский – Семёнов – Пустозёров, Карпухин – Марченко;
• Денисенко – Тодд – Сем.Терехов, Лучевников – Ст. Терехов;
• Дыняк – Кателевский – Бровкин (Бардин), Потапов.

Казан командасы составында бүген яңа уенчы Нэйтан Тодд бар иде. Ул узган атнада Артемий Князев һәм Брэндон Бирога алмашка «Спартак»тан күчеп килде.

«Салават Юлаев»

• Вязовой (И. Коновалов);
• Броссо – Родуолд – Ремпал, Панин – Зоркин;
• Сучков – Алалыкин – Жарковский, Цулыгин – Кулик;
• Бутузов – Хохряков – Ян, Фәизов – Варлов;
• Кузнецов – Ефремов – Горшков, Комаров – Газимов.

31 гыйнварда Казанның «Татнефть Арена» боз сараенда «Ак Барс» һәм Түбән Каманың «Нефтехимик» командалары көч сынашачак. Матч 17:00 сәгатьтә башлана.