Казанда буран сәбәпле кайбер автобусларның хәрәкәте туктатылды
Казанда көчле кар яву сәбәпле 93, 89А һәм 36А номерлы автобуслар линиягә чыкмады. Шулай ук багана аву сәбәпле 1 нче троллейбус маршруты хәрәкәте дә туктатылды.
Моннан тыш, 40 һәм 78нче номерлы автобус маршрутлары вакытлыча кыскартылды. Бу хакта шәһәрнең Транспорт комитетында хәбәр иттеләр.
Мэрия мәгълүматлары буенча, соңгы тәүлектә шәһәрдә - айлык норманың өчтән бер өлеше, ә бер ай эчендә норманың 145 проценты күләмендә явым-төшем күзәтелгән. Казанда 9 баллы бөкеләр теркәлә.
Элегрәк синоптиклар Татарстанда алты көн эчендә айлык нормадан күбрәк явым-төшем күзәтелергә мөмкин дип кисәткән иде. Алексеевск - Әлмәт түләүле трассасы һаман да ябык кала, федераль трассаларда чикләүләр гамәлдән чыгарылды.