Дүшәмбе Татарстанда тагын буран көтелә

Алдагы тәүлектә Татарстан территориясендә тагын буран көтелә, буран вакытында күз күреме 1000 метрга кадәр начараячак. Синоптиклар мәгълүматларына караганда, шулай ук көчле кар явуы көтелә, ә юлларда урыны белән кар көртләре барлыкка киләчәк.

Россия Гадәттән тыш хәлләр министрлыгының Татарстан буенча Баш идарәсе кисәтү таратты һәм халыкны иминлек чараларын үтәргә өндәде. Ведомство түбәндәгеләрне тәкъдим итә:

. җәяүлеләр кичүе аша гына юл аркылы чыгарга;

. автомобильләрне начар беркетелгән конструкцияләрдән ераграк куярга һәм алар янында тормаска;

. түбәләрдә кар һәм боз күп җыелган урыннарны урап узарга;

. юлда кискен маневрлар (бер полосадан икенчесенә чыгу, алдагы машинаны узу) ясамаска.