Мәктәпкә, балалар бакчасына кабул иткәндә россиялеләргә өстенлек бирергә тәкъдим иттеләр
Дәүләт Думасы депутаты Каплан Панеш дәүләт балалар бакчаларына һәм мәктәпләренә балалар кабул иткәндә Россия гражданнарына өстенлек бирелергә тиеш дип белдерде. Аның сүзләрен «РИА Новости» китерә.
Депутат билгеләп үткәнчә, кешеләр еллар буе йорт яннарындагы балалар бакчаларында яки мәктәптә урын ала алмый.
Панеш дәүләт мәгариф учреждениеләренә кабул иткәндә Россия гражданнарына өстенлек закон нигезендә төгәл билгеләнергә тиеш дип саный.
Аның фикеренчә, яшәү урыны буенча беренче чиратта урын алу хокукы ата-аналары Россия Федерациясе гражданнары булган һәм тиешле муниципалитетта даими яшәүче балаларга беркетелергә тиеш. Бары тик Россия гражданнары арасыннан барлык теләүчеләр урыннар белән тәэмин ителгәннән соң гына мигрант гаиләләренең гаризаларын карарга мөмкин – буш урыннар булганда.
Моннан тыш, депутат электрон чиратларны формалаштыруны контрольдә тотуны катгыйландыру өчен чыгыш ясады. Ул белдергәнчә, система үтә күренмәле булырга тиеш, исәпкә куелу датасы теркәлергә һәм ташламалар яки чираттан тыш күчерү өчен нигезләр расланырга тиеш.