Казанда ветераннар һәм махсус хәрби операциядә катнашучылар арасында хәйрия матчы уза

Татарстан башкаласында беренче мәртәбә «Россия спорты» программасы кысаларында «Татарстан Геройлары» хәйрия гала-матчы уза, аның төп бурычларының берсе - сугыш хәрәкәтләре ветераннарын тернәкләндерү.

Спорт министры урынбасары Илдар Садриев әлеге вакыйганың республика өчен әһәмиятен билгеләп үтте.

«Хәрби хезмәткәрләр һәм хәрби хәрәкәтләр ветераннары, махсус операциядә катнашучылар белән эшләгәндә, без нәкъ менә спорт белән шөгыльләнүгә зур ихтыяҗ барлыгын күрәбез. Физик активлык, команда рухы, спорт белән мавыгу егетләргә фронт сызыгыннан кайткач яңадан тормышның тәмен тоярга ярдәм итә. «Татарстан Геройлары» гала-матчы «Россия спорты» дәүләт программасы кысаларында уздырыла, аның төп бурычларының берсе - хәрби хәрәкәтләр ветераннарын тернәкләндерү. Без мондый алымны хуплыйбыз һәм мөмкин кадәр күбрәк ветераннарны спорт хәрәкәтенә җәлеп итәргә тырышабыз», - диде Садриев.

Чара Татарстан Республикасы Камера хоры чыгышы белән ачылды, шулай ук Рөстәм Жиг һәм «Жены СВО» коллективы катнашында концерт программасы оештырылды. Спорт сарае холлында аниматорлар һәм аквагрим белән балалар зонасы, кыр кухнясы тәкъдим ителгән иде, бүләкләр дә уйнатылды.

«Татарстан Геройлары» хәйрия гала-матчы Казанның Спорт сараенда уза. Керү ирекле.