Экспертлар Якын Көнчыгыш конфликтының Россия өчен нәтиҗәләрен бәяләде

Якын Көнчыгыштагы вазгыятьнең кискенләшүе Россиянең төрле өлкәләрдәге мәнфәгатьләренә кагылачак – нефтькә һәм логистикага бәяләрдән алып дөнья тәртибен глобаль үзгәртеп коруга кадәр. «Время Н» басмасы тарафыннан сораштырылган экспертлар хәзерге кризисның илгә йогынтысының төп факторларын аерып күрсәткән.

Социолог Александр Прудник төбәкне «дары мичкәсе» белән чагыштыра, XX гасыр башында Балкан шундый хәлдә иде. Аның фикеренчә, хәзер конфликтта катнашучылар артында дөнья державалары мәнфәгатьләре тора, ә кампания үзе глобаль системаны яңадан форматлаштыру процессын башлап җибәрде. Шул ук вакытта эксперт фикеренчә, конфликт Мәскәүнең турыдан-туры катнашыннан башка хәл ителәчәк.

Түбән Новгород өлкәсе Законнар Җыены депутаты Рөстәм Досаев икътисади аспектка кагылган. Ул билгеләп үткәнчә, Иран – энергия чыганаклары белән тәэмин итү буенча лидерларның берсе, һәм нефтькә бәяләр үсеше Россия бюджеты өчен отышлы. Әмма бу вазгыятьнең икенче ягы да бар: нефтькә дөньякүләм бәяләр арткан саен, логистика да кыйммәтләнә.

Сәяси күзәтүче Сергей Кочеров фикеренчә, хәрби-сәяси күзлектән караганда, АКШ көчләрен Иранга юнәлтү аркасында Россия өстенлек ала. Моннан тыш, Кочеров фикеренчә, әгәр АКШ җитәкчелеге Якын Көнчыгыш сугышында «батса», Россиягә бу билгеле бер карт-бланш бирәчәк.

Шул ук вакытта экспертлар икътисади фаразларда сак булырга чакыра. «Нефтькә бәяләр озак вакыт югары булып калачак, дип щйтеп булмый. Сикерүдән соң һәрвакыт төшү килә», - дип нәтиҗә ясады Сергей Кочеров.