Татарстанда төнге салкыннардан соң -4 градуска кадәр җылыта

Бүген, 7 мартта, Татарстанда болытлы һәм карлы һава торышы саклана. Бу хакта ТР Гидрометеорология үзәге хәбәр итә.

Республикада болытлы һава торышы була. Төнлә кайбер урыннарда гына яуган кар көндез төбәкнең бөтен территориясендә явачак. Кайбер районнарда, шул исәптән Казанда, буран көтелә.

Җил секундына 6-11 метр тизлек белән башта төньяк-көнбатыштан, аннары көньяк-көнбатыштан исәчәк. Көндез ул урыны белән секундына 15-17 метрга кадәр (ТР башкаласында секундына 15 метрга кадәр) көчәячәк. Юлларда бозлавык булачак.

Төнге -13, -18 (аязганда -24) градуслардан соң көндез Татарстанда һава -4, -9 градуска кадәр (Казанда -4, -6 градуска кадәр) җылыначак.

Элегрәк «Татар-информ» Татарстанда 8 марттан соң 27 градуслы салкыннар башлана, дип хәбәр итте.