Түбән Кама делегациясе Омскида федераль Сабан туен әзерли

3 мартта Федераль Сабан туен оештыру буенча эшлекле сәфәр булды: Радмир Беляев җитәкчелегендәге Түбән Кама делегациясе Омскида булды, быел анда бәйрәм үткәрү планлаштырыла, дип хәбәр итте муниципаль район башкарма комитеты җитәкчесе Рөстәм Латыйпов эшлекле дүшәмбедә.

«Без коллегаларга Түбән Каманың социаль-икътисади потенциалын тәкъдим иттек. Омск – Түбән Кама кебек үк эре сәнәгать үзәге булып тора, анда ягулык, химия һәм нефть химиясе, шулай ук азык-төлек тармаклары бар», - дип билгеләде ул.

Латыйпов сүзләренчә, ике шәһәрнең икътисади үсеш мәсьәләләрендә уртак яклары күп. Түбән Камадан килүчеләр Омск коллегаларын хезмәттәшлек перспективалары турында җентекләбрәк фикер алышу өчен шәһәргә чакырды.

Бәйрәмгә әзерлек буенча эшлекле төркем составына керүчеләр «Яшел утрау» мәдәният һәм ял паркында булды, Омск өлкәсе Мәдәният министрлыгында очрашу уздырды һәм чараны уздыруда оештыру мәсьәләләре турында фикер алыштылар.

Федераль Сабан туе Омскида беренче тапкыр узачак. Төбәккә Россиянең күп төбәкләреннән, шулай ук Казахстанның чик буе өлкәләреннән делегацияләр килер дип көтелә.

«Татарстан командасы составында безнең бурыч – милли колоритны традицияләр һәм мәдәният аша күрсәтү. Түбән Каманың мондый масштаблы вакыйгаларны уздыру буенча бай тәҗрибәсе бар: узган ел без Татарстанны Якутиядәге Федераль Сабан туенда уңышлы тәкъдим иттек», - дип ассызыклады Латыйпов.

Чараны оештыру комитетын Омск өлкәсе ягыннан губернатор Виталий Хоценко җитәкли.