Марат Нуриев: Иске йортларны заманча иминлек таләпләренә туры китерергә кирәк

Бүгенге көндә иске йортлардагы иминлек системаларын заман таләпләренә туры китерү бурычы тора. РФ Дәүләт Думасына Татарстаннан сайланган депутат Марат Нуриев «Татар-информ» агентлыгына шул хакта хәбәр итте.

«Яңа йортмы ул, әллә искеме – анысы мөһим түгел, төп күрсәткеч – анда яшәүчеләрнең иминлеге. Хәзер яңа торак комплекслар торгызганда барлык кирәкле нормалар да исәпкә алына, әмма иске йортлар төзелгәндә нормативлар башка иде. Аларны заманча иминлек таләпләренә туры китерергә кирәк», - диде агентлык әңгәмәдәше.

Ул билгеләп үткәнчә, хәзер мондый яңа таләпләргә күчү капиталь ремонт һәм йортны агымдагы карап тоту аша гамәлгә ашырыла.

Бүген Марат Нуриев «Бердәм Россия» праймеризында катнашу өчен документлар тапшырды. Аның ярдәмендә РФ Дәүләт Думасына депутатлар сайлауда Татарстанда партияне кемнәр тәкъдим итәчәген билгелиләр.