Казан югары уку йортының тулай торагының хуҗалык мөдирен ришвәт алган өчен хөкем итәләр
Бүген Казанның Идел буе судында Казан аграр университеты тулай торагының элеккеге хуҗалык мөдире Гөлнирә Турсунованың эше буенча процесс булды. Ул күпсанлы мошенниклык эпизодларында һәм законсыз миграция оештыруда гаепләнә.
Тикшерү версиясе нигезендә, Турсунова 2020 елдан 2024 елга кадәр студентлардан 11 меңнән 120 мең сумга кадәр ришвәт алган. Моның өчен ул аларга сессияне уңышлы тапшырырга ярдәм итәргә вәгъдә иткән. Моннан тыш, Таҗикстаннан килгән Турсунова университет бүлеп биргән бүлмәсенә үзенең ирен законсыз рәвештә теркәгән.
Бүген суд Турсуновага карата сайланган чикләү чарасын үзгәртү мәсьәләсен карады. Яклау ягы өй арестында булган 63 яшьлек хатын-кызның чикләү чарасын йомшартуны сорады. Бу мөрәҗәгать Турсунованың сәламәтлек хәле начар булу белән аңлатылды.
«Миңа хастаханәгә йөрергә кирәк. Кан басымым югары, сәламәтлек хәлем яхшы түгел», – диде Турсунова судта.
Судья хатын-кызга йомшаграк чикләү чарасы билгеләде – аңа хәзер билгеле бер гамәлләрне башкару тыела. Эшне тикшерә башлау икенче утырышка күчерелде.