Prezident taqiqiga qaramay, vrachlardan metallolom uchun haq ushlab qolindi
Surxondaryo viloyatining Sho‘rchi tumani Davlat epidemiologiya-sanitariya nazorat markazi (DSENM) xodimlarining bir kunlik ish haqi metallolom uchun ushlab qolindi.
Bu haqda Ozodlikka xabar bergan shifokorlarning aytishlaricha, bosh vrach ham, bu haqda topshiriq bergan tuman hokimligi ham joriy yilning 1 yanvaridan boshlab ta’lim va tibbiyot muassasalariga temir-tersak yig‘ish prezident qarori bilan taqiqlanganini nazar-pisand qilmayapti.
Tuman hokimligi metallolomga pul o‘tkazish haqida topshiriq berilganini inkor qilmoqda.
Sho‘rchi tumani DSENMda ishlaydigan, ismi sir qolishini so‘ragan xodimlardan birining Ozodlikka aytishicha, ulardan bir kunlik ish haqini metallolomga o‘tkazish to‘g‘risidagi ro‘yxatga imzo chekdirib olingan.
“Markazning qariyb 80 nafar shifokoru hamshiralari 30-50 ming so‘m atrofidagi bir kunlik ish haqini metallolomga o‘tkazishga majburlandi. Hamma ro‘yxatga imzo chekdi. Direktorimizning aytishicha, bu hokimiyatning topshirig‘i va biz buni bajarishga majbur ekanmiz. Prezidentimiz bu yildan boshlab o‘qituvchiyu shifokorlarni metallolomdan ozod qilgan bo‘lsayu, bular bilganini qilsa. Bu rahbarlar prezidentning qarorini nega bajarmaydi”, - deydi shifokorlardan biri.
Ismi sir qolishini so‘ragan markaz hamshiralaridan biri dekabrda obuna¸ mart oyida esa¸ makulatura solig‘i solinganini bildirdi.
“O‘tgan yilning oxirida har bir xodimdan 100-200 ming so‘mdan obuna uchun ushlab qolishdi. Koshkiydi biz obuna bo‘lgan gazetalarimizni qo‘limizga olsak. Mart oyida esa har bir xodim 9 kilogrammdan makulatura topshirishga majburlandi. Do‘konlarga kirib, iltimos qilib, korobka-morobka qilib olib kelib topshirdik. Endi esa yana metallolom uchun bir kunlik ish haqimizdan ushlab qolishayapti. Baribir biz hokimlikka mutelikdan qutula olmayapmiz”, deydi bu hamshira.
Sho‘rchi tumani DSENMining ismi sir qolishini so‘ragan mulozimlaridan biri, Ozodlik bilan suhbatda metallolomga pul o‘tkazish topshirig‘i hokimiyatdan bo‘lganini aytdi.
“Siz ham qiziq savol berasiz, albatta bunday topshiriqlar hokimlikdan bo‘ladi-da. Metallolom, makulatura bizga nima zaril, shunday ham o‘z ishimizdan ortmaymiz. Hokimiyatdan so‘rang, hokimiyatdan”, - dedi mulozim.
Sho‘rchi tumani hokimining yordamchisi Ahliddin Xolmatov shifokorlarga metallolom topshirig‘i berilganini inkor qildi.
“Yo‘q, bunaqa topshiriq berilgan emas. Agar beriladigan bo‘lsa, metallolomning o‘zini beringlar deyiladi, bir kunlik ish haqi deb emas. Lekin bog‘chalarga ham, maktablarga ham, tibbiyotga ham bunday topshiriq bo‘lmagan. Bu yerda qandaydir tushunmovchilik borga o‘xshaydi”, - dedi Ahliddin Xolmatov.
Joriy yilning yanvar oyida Sho‘rchi tuman Davlat sanitariya-epidemiologiya nazorat markazining shifokor va hamshiralari fermer xo‘jaliklari va aholi uylarida qancha go‘ng zaxirasi borligini aniqlashga safarbar qilingani haqida Ozodlik xabar bergan edi.
O‘zbekiston prezidenti Shavkat Mirziyoev 18 dekabrda imzolagan temir tersak yig‘ishning 2018 yilga mo‘ljallangan chora-tadbirlari to‘g‘risidagi qarorda 2018 yilning 1 yanvaridan ta’lim va tibbiyot muassasalariga metallolom va temir-tersak chiqindilarini yig‘ish bo‘yicha ko‘rsatmalar berish taqiqlagan edi.
Ozodlik radiosi temir –tersak yig‘ishga yoki buning uchun pul yig‘ishga nafaqat o‘qituvchilar, o‘quvchilar va tibbiyot xodimlari, balki fermerlar hamda bolalar bog‘chasiga qatnaydigan farzandlari bor ota onalar ham jalb qilib kelinganini muntazam yoritib kelgan.