Жисмоний шахслар янги автомобиль харид қилиш учун илгари ҳайдалган эскисини автосалонга топшириш ва орадаги фарқни тўлаш мумкин бўлади. Бу Ўзбекистон Республикаси Президентининг «Ўзбекистон Республикаси автомобиль саноатини жадал ривожлантириш бўйича чора-тадбирлар ҳақида»ги қарорида ўз аксини топган. Президент қарорига кўра, Ўзбекистон Республикаси Иқтисодиёт ва саноат вазирлиги ҳамда «Ўзавтосаноат» АЖнинг 2019 йил 1 октябридан ўзимизда ишлаб чиқарилган янги автотранспорт воситалари савдоси билан шуғулланувчи расмий дилерлик ташкилотига ўзининг эски, истеъмолда бўлган автотранспорт воситасини топшириш ва қийматлардаги фарқни тўлаш йўли билан харидорларга ўзимизда ишлаб чиқарилган янги автотранспорт воситасини харид қилиш имконини берувчи «TRADE-IN» дастурини 2019 йил 1 октябрдан бошлаб жорий этиш таклифига розилик берилган. «TRADE-IN» дастури доирасида қуйидагилар белгиланмоқда: а) расмий дилер томонидан жисмоний шахсларнинг истеъмолда бўлган автотранспорт воситаларини сотиш вақтида қўшилган қиймат солиғини ҳисоблаш учун солиқ базаси сотиш баҳоси ва ҚҚС суммасини ўзида жам қилган чиқарилаётган объектларнинг баланс қиймати ўртасидаги мусбат фарқ орқали аниқланади; б) расмий дилерлар томонидан олди-сотди шартномаси мажбурий нотариал расмийлаштиришдан қуйидагилар ўтказилмайди: · харидорга белгиланган намунадаги ҳисоб-маълумотома бериш тартиби жорий этиш орқали аввал истеъмолда бўлган автотранспорт воситалари сотилганда; · миллий ишлаб чиқарувчи заводларда ишлаб чиқарилган автотранспорт воситалари расмий дилерлардан харид қилинганда; в) расмий диллерлик ташкилоти томонидан аввал истеъмолда бўлган автотранспорт воситаларини харид қилинганда ва Ўзбекистон Республикаси ИИВ органларида қайддан ўтказилганда йиғим тўланмайди. Ўзбекистон Республикаси ИИВга миллий ишлаб чиқарувчи заводларнинг расмий дилерларига «TRADE-IN» дастури бўйича аввал истеъмолда бўлган автотранспорт воситаларини сотиш учун тегишли тарзда ҳимояланган ҳисоб-маълумотнома бланкалари билан таъминлаш вазифаси юклатилмоқда. «Ўзстандарт» агентлиги, Ўзбекистон Республикаси Иқтисодиёт ва савдо вазирлиги ҳамда «Ўзавтосаноат» АЖ илғор хорижий тажрибаларни ҳисобга олиб, тегишли муддатларда ушбуларни амалга ошириши керак: · 2019 йилнинг 1 ноябрига қадар эҳтиёт қисмлар ва бутловчи буюмлар сифати ва хавфсизлик кўрсаткичларини таъминловчи типли синов дастурларини ишлаб чиқиш ва тасдиқлаш; · 2019 йилнинг 1 декабрига қадар Ўзбекистон Республикаси Вазирлар Маҳкамасига Пскент автомобиль полигони базасида автомобиллар ва ва уларнинг эҳтиёт қисмларини синаш базасини яратиш, шунингдек, уни зарур техника ва ускуналар билан таъминлаш; · 2020 йилнинг 1 январига қадар автотранспорт воситалари, эҳтиёт қисмлар ва бутловчи буюмларни синашнинг тўлиқ спектрини таъминлаш учун миллий лабораторияларни зарур техника ва ускуналар билан таъминлаш; · 2020 йилнинг 1 мартига қадар «Автомобиллар учун корпоратив ўртача ёқилғи иқтисоди» стандартини яратиш ва жорий этиш. Президент қарори билан «Автомобиль саноатини жадал ривожлантириш бўйича чораларни ишлаб чиқириш амалга ошириш бўйича Ишчи гуруҳ таркиби тасдиқланган. Шунингдек, қарор ижросини таъминлаш учун батафсил амалий тадбирлар режаси ҳам тасдиқланган.
