БАҒРИ ХИЁНАТГА ТЎЛГАН ЭРКАК ЎША БАҒРИДАН ДИЁНАТГА ЖОЙ ТОПА ОЛМАДИ…
Яқинда Россиянинг Челябинск шаҳрида касалхона бош врачи ва депутат Озод Зарипов ҳуқуқни муҳофаза қилиш ташкилоти ходимлари тарафидан қўлга олинди. У хотинини фарзандлар қаршисида отиб ўлдирганликда айбланди. Нега? Нима учун хотинини ўлдирди? Депутат, касалхона бош врачи, ҳурматли, кўпнинг назари, эътиборидаги одам нимага бундай жиноятга қўл урди? Бу саволларга терговчилар жавоб беришди.
Маълум бўлишича, шу йил 21 август куни кечаси Зарипов ҳақиқатан фарзандларининг кўз ўнгида ўзидан 16 ёш кичик бўлган хотини Еленани ухлаб ётган ерида отиб ўлдирган. Терговда айтдики, Елена унга турмушга чиққандан бери бекитиқча, гоҳ ошкора хиёнат қилиб келган.
— Мен аслида табиатан рашкчиман, — деди Зарипов. — Биринчи хотинимнинг хиёнатлари туфайли кўп бора руҳий азоб чекканман. Охири ажрашишга мажбур бўлдим. Еленага ёш бўлса-да, севиб уйлангандим. Яна адашибман. Елена ҳам менга хиёнат қила бошлаганини пайқадим. Трейдинг билан шуғуллана бошлади. Кечалари бегона эркаклар унга қўнғироқ қиладиган бўлди. Асабийлашардим, чидардим. Бироқ ҳамма нарсанинг ҳам чек-чегараси бор ахир. Охирги марта у мендан сўраб ўтирмай, дугонаси билан Туркияга дам олиш учун жўнаб кетди. Болалар мен билан қолди. Қайтиб келгандан кейин тасодифан телефон орқали бегона эркак билан СМС ёзишаётганини кўриб қолдим. Ўшанда 2018 йил феврал ойи эди. Бунисига ҳам кўз юмиб, бу қилиғини ҳам ёшлигига йўйиб қўя қолардим. Афсуски, у ўшандан бошлаб то шу кунларгача мен билан бирга ётмайдиган, ўзи алоҳида ухлайдиган одат чиқарди. Менга эр сифатида эътибор бермай қўйди. Нуқул йўқ жойдан жанжал чиқаришга ўрганди. Охири чидай олмадим. Айниқса, 2019 йил июнида бегона эркак унга муҳаббат изҳор қилганини яна телефонида кўрдим-у, ҳаммаси тугаганини ҳис этдим. Қарангки, яқинда Елена Новосибирскка болаларимни ҳам олиб ўша муҳаббат изҳор қилган Антон исмли эркакникига кетмоққа шайланди. Бу 2019 20 август куни эди…
Хуллас, депутат 11 йилдан бери ичкилик ичмаганини ёдга олди. Аламига чидай олмай, дўконга борди-ю, ичкилик сотиб олди. Ичди. Сўнгра Еленанинг отасига қўнғироқ қилиб, қизи Новосибирскка кетмоқчи бўлаётганини айтди. Гап орасида қилган хиёнатларини ҳам тўкиб солди. Ота-ку, қизига қўнғироқ қилиб тушунтиришга уринди. Елена уни ҳам койиб солди. Шундан кейин Зарипов яқин дўстлардан бирига қўнғироқ қилди. Икковлари ўтириб яна ичкилик ичишди. Уйга ширакайф ҳолда келган депутат яна Еленанинг қўпол муносабатига рўбарў бўлди. Шуниси ошиб тушди. Гаражга кирди-ю, қуролни олиб Елена ухлаётган хонага кирди ва унга қарата ўқ узди. Кенжа ўғли сезган экан. Келиб қўлидан тортқилади-ю, ўқ аёлнинг оёғига тегди. Аммо Зариповни фарзандларнинг ҳайқириғи ҳам тўхтата олмади. У иккинчи ўқни Еленанинг қорин қисмига йўллади. Аёл шу жойнинг ўзида ўлим топди. Депутат эса яна қайнотасига қўнғироқ қилиб Еленани ўлдириб қўйгани ҳақида хабар берди. Кейин дарё бўйига бориб ўз жонига ҳам қасд қилмоқчи бўлди. Қўлидан келмади. Эрталаб соат 5: 30 да уни полициячилар қўлга олишди.
Айни пайтда тергов ҳаракатлари давом этмоқда.
Олимжон ҲАЙИТ