ТИББИЁТ ХАБАРЛАРИ ҚИСҚА САТРЛАРДА…
Кардиологлар огоҳлантиради: ЮРАГИ ХАСТАЛАР УЧУН ХАВФЛИ МАВСУМ БОШЛАНДИ…
Дунё кардиологлари қиш фасли кириб келиши муносабати билан сурункали юрак хасталикларига чалинганларни доимий тарзда ҳушёр бўлишга чақиришмоқда. Организм янги мавсумга мустақил мослашиш учун интилади. Аммо ҳар доим ҳам бу интилиш муваффақият келтиравермайди. Натижа эса яна ўша инфаркт билан якунланади.
Агар беморнинг юрагида суст, аммо доимий оғриқ пайдо бўлса, кўкрак қафаси ачиша бошласа, ҳадеганда ҳаво етишмаслиги кузатилса, жағларида толиқиш кўзга ташланса, дарҳол врачга мурожаат этиши лозим. Бундай ҳолат беморлардан ташқари, ёши элликдан ўтган одамларда, кашандаларда, гипертоникларда ҳам юзага келиши мумкин. Улар ҳаво ҳароратининг сакрашидан, организмни зўриқтиришдан сақланишлари керак.
ОЧЛИК ЮРАК ХАСТАЛИКЛАРИГА ЙЎЛИҚИШДАН АСРАРКАН…
Европада бир гуруҳ олимлар юрак хасталигига йўлиқишдан сақланишнинг янги усулини топишибди. Ҳатто, бу усулни амалда исботлаш учун икки мингга яқин кўнгиллиларни ҳам жалб этишибди. Хўш, қандай усул экан деб ўйлайсиз? Тез-тез кунни оч ўтказиш инфарктга учрашдан сақларкан. Одам очлик ҳиссини туйганда, юрак фаолияти яхшилана бораркан. Шундай қилиб, тез-тез очликда кун ўтказганлар орасида юрак хуружи туфайли ўлиш ҳолати 45 фоизга камаяркан. Одамнинг умри узаяркан.
Афсуски, бу изланишни ер юзидаги аҳолининг аксарияти қоралаб чиқди. Айниқса, юрак хасталигини бошдан кечираётганлар бу изланишларга, олимларнинг фикрига қўшилмайди. Улар оч қолган пайт юракка қон етиб бориши қийинлашиши, ҳатто, нафас олишга қийналишини баён қилишди. Қолаверса, умрни Оллоҳдан бошқаси ҳеч қандай йўл билан узайтира олмаслигини таъкидлашди.