Олий Мажлис депутати Энергетика вазирлиги раҳбариятини истеъфога чиқишга чақирди
Олий Мажлис Қонунчилик палатаси депутати Дониёр Ғаниев энергетик коллапс кузатилаётган Ўзбекистонда Энергетика вазирлиги мутасаддиларининг истеъфога кетиши энг тўғри йўл бўлиши урғулади.
Депутат Ғаниев ўз Телеграм-каналида қолдирган постида ўта оғир кечган 2020 йилдан сўнг ҳар йилгидан-да совуқ келган қиш мавсумида энергия инқирози барчани қийнаётгани, бу ҳолат аҳоли орасида кескин норозилик, ижтимоий инқирозни келтириб чиқарибгина қолмай, иқтисодий фаолликни ҳам сусайтириб, мамлакат иқтисодиётига салбий таъсир кўрсатаётганига, энергетика соҳасидаги муаммолар охирги йилларда олиб борилган барча ижобий ўзгаришларни “ювиб юбораётгани”га эътибор қаратган.
“Энди ўйлаб кўринг, совуқ қиш, катта оила, на газ, на электр бор! Оиланинг кекса инсонлари ёки чақалоқлар совуқдан қалтираб ўтирса, оиланинг ёшлари ҳар қанча уринмасин уйини иситишга, уларни фаровон ҳаётини таъминлашга имконияти бўлмаса, бундай одамларга ислоҳотларнинг нима кераги бор? Бу одамлар учун ҳар қандай ислоҳотлар, ҳар қандай қонунлар, қўпол қилиб айтганда, “1 тийин”!!! УЛАР СОВУҚДАН ҚИЙНАЛИШМОҚДА. Бундай ҳолатда уларга фақат бир нарса керак, ЭНЕРГИЯ ТАЪМИНОТИ!” деб ёзган қуйи палата депутати Д. Ғаниев.
Депутат ўз сайлов округидан келаётган “ҳар 10 та мурожаатдан 9 таси айнан электр ва газ муаммоси тўғрисида” бўлаётганини таъкидлаган.
“Аслида, бу ҳолатга биз депутатлар ҳам қисман айбдормиз, чунки Энергетика вазирлигининг раҳбариятини ўзимиз тасдиқлаб берганмиз. Мамлакатдаги бу ҳолатда энергия инқирози юз беришига сабаб бўлган раҳбарлар истеъфоси энг тўғри йўл бўлади. Аслида демократик давлатларда бундай инқирозлар ортидан раҳбарлар ўз ихтиёри билан истеъфо беради. Лекин бундай қила олиш учун эса, биринчи навбатда, раҳбарда орият бўлиши керак. Бизнинг энергетика соҳа раҳбарларида эса энергетика таъминоти каби орият ҳисси ҳам “инқирозда”, дея қайд этган депутат Д. Ғаниев.
2020 йилнинг 18 ноябридан ҳаво ҳарорати кескин совиб, қор ёғиши билан Ўзбекистон бўйлаб ҳар йили кузатиладиган қишки энергетик бўҳрон эртароқ бошланди. Ҳатто Тошкентнинг қатор туманларида қозонхона ва қувурлар ишдан чиққани, аксар вилоятларда электр токи узилган, суюлтирилган газ учун навбатлар узайгани кузатилди.
Президент Шавкат Мирзиёев 2016 йилда президентликка сайланишидан олдин аҳолининг электр ва газ муаммосини ҳал қилишга ваъда берган эди. Аммо бу йилги куз-қиш мавсуми мамлакат энергетика тизимидаги инқироз кўлами катта эканини кўрсатди.
Ноябрь ойидан буён электр узилиши ва табиий газ йўқлигидан норози бўлган аҳоли вакилларининг норозилик чиқишлари кузатилмоқда.