Қозоғистонда журналистларга қарши “провокацион ҳужумлар координатори” қўлга олингани билдирилди

Қозоғистон Ички ишлар вазирлиги 28 февраль куни ўз телеграм-каналида “журналистларга қарши провокацион ҳужумлар координатори” қўлга олинганини маълум қилди.

Билдирувда бу амалиёт ИИВ ва ДХҚнинг идоралараро тергов-тезкор гуруҳи ҳамкорлигида амалга оширилгани қайд этилади.

“Улар Жиноят кодексининг 115-моддаси «Қўрқитиш», 147-моддаси “Шахсий дахлсизликни бузиш”, 158-моддаси “Журналистлик фаолиятга тўсқинлик қилиш”, 202- моддаси “Ўзгалар мулкини қасддан нобуд қилиш ёки шикастлаш” ва 293-моддаси «Безорилик» каби жиноятларни содир этганликда гумонланмоқда”, — дейилади хабарда.

Полиция мазкур ҳуружларнинг бевосита координатори чет эл фуқароси ва малакали хакер O.Токарев эканини, у Олмаотада қўлга олинганини билдирди.

Сўнгги олти ой ичида қозоғистонлик журналистлар ва таҳририятларга таҳдидлар тез-тез бўлиб турган эди. Масалан, 22 февраль куни журналист Дониёр Молдабеков Олмаотада ниқобли шахс томонидан калтакланганини айтган.

20 февралга ўтар кечаси Олмаотада «Гиперборей» YouTube канали муаллифи Вадим Борейко билан ҳамкорликда ишлаган Роман Егоровнинг машинаси ёниб кетди.

19 январга ўтар кечаси номаълум шахслар журналист Вадим Борейко хонадони эшигини пенополиуретан билан тўлдирган.

Бир кун аввал Ulysmedia.kz лойиҳаси раҳбари Самал Ибраева ижтимоий тармоқларда сайтга хакерлик ҳужуми уюштирилгани ва унда ўзи ва фарзандларининг шахсий маълумотлари жойлаштирилгани ҳақида хабар берган эди.

Январь ойи охирида Orda.kz сайти бош муҳаррири Гулнар Бажкенова аввалги квартирасининг эшиги шикастлангани ҳақида хабар берган эди.

Бир кун аввал журналист Динара Эгеубаева номаълум шахслар машинаси салонига ғишт ташлаб, машинани ёқиб юборганини хабар қилган эди. Шу ойда Эгеубаева ўғлига қурол билан ҳужум қилинганини айтди.

13 январга ўтар кечаси номаълум кимсалар «Элмедиа» таҳририяти жойлашган бинонинг кириш гуруҳи ойналарини яна синдириб ташлади.