Путин вагнерчилар исёни чоғида ҳарбий учувчилар ўлганини тан олди
Россия президенти Владимир Путин 26 июнь оқшомидаги халққа мурожаатида “Вагнер” ХҲШ раҳбари Евгений Пригожин исёни пайтида ҳарбий учувчилар ҳалок бўлганини эътироф этди. Бу маълумот олдин расман тасдиқланган эмасди.
“Ҳалок бўлган учувчиларнинг жасорати Россияни қутқариб қолди”, деди Путин.
Унга кўра, ХҲШ жангчиларидан “қора ният”да фойдаланишмоқчи бўлишган. Айни пайтда Путин “ягона тўғри қарор қабул қилган” ва “сўнгги ҳадда тўхтаган” ёлланма вагнерчиларга миннатдорлик билдирди. У “Вагнер” жангчиларига Россия Мудофаа вазирлиги билан шартнома тузиш, оиласи бағрига қайтиш ёки Беларусга чиқиб кетишни таклиф қилди.
“Ким истаса, Белоруссияга ҳам кетиши мумкин. Мен томонимдан берилган ваъда бажарилади. Такрор айтаман, ҳар бирингиз ўзингиз хоҳлаган йўлни танлайсиз, бироқ бу ўз фожиали хатосини англаган Россия жангчиларининг танлови бўлишига аминман”, деди Путин.
Россия президенти қон тўкилишига йўл қўймасликка қаратилган қадамлар унинг буйруғига кўра 24 июнь воқеалари бошидан бери қўйилганини билдириб, бу иш хато қилганларнинг хатосини англаш учун имкон бериш мақсадида қилинганини урғулади.
Путин фикрича, исён тўхтатилишидаги асосий ролни россияликларнинг ватанпарварлик кайфияти, Россиядан бутун жамиятнинг жипслашуви ўйнаган. У Александр Лукашенкога ҳам “вазиятни тинч йўл билан ҳал этилиши йўлидаги саъй-ҳаракати ва ҳиссаси учун” миннатдорлик билдирди.
Россия президентининг халққа мурожаати беш дақиқадан сал кўпроқ давом этди, бунинг учун Биринчи каналнинг ёйини тўхтатилди.
Мурожаат олдидан кўплаб нашрлар президентнинг матбуот котиби Дмитрий Песковнинг Путин хитоби “Россия тақдирини белгилаши”га оид сўзларидан иқтибос келтирди. Бу иқтибосни, жумладан “Интерфакс” агентлиги Владимир Соловьёв сўзларига таянган ҳолда келтирган эди. Бироқ Путиннинг мурожаатидан кейин Песков The Bell нашрига бунақа гапни айтмаганини билдирган.
Аввалроқ душанба куни Лукашенко ҳам чиқиш қилиши кутилаётгани айтилганди. Бироқ кейин Лукашенконинг журналистлар олдидаги чиқиши 27 июнь кунига кўчирилган.