Хоқон Фидан: «Минтақадаги кескинлик халқаро хавфсизликка ҳам таъсир қилиши мумкин»
“Иккала томон – ҳам Исроил, ҳам Фаластин учун адолатли тинчликка эришиш учун ҳаракат қилиш керак”. Бу ҳақда Туркия ташқи ишлар вазири Хоқон Фидан Миср пойтахти Қоҳирада 30 дан ортиқ давлат ҳамда бир қатор халқаро ва минтақавий ташкилотлар иштирокида Фаластин-Исроил муаммоси бўйича ўтказилган халқаро тинчлик саммитида сўзлаган нутқида маълум қилди.
Х.Фидан фикрича, минтақадаги кескинлик халқаро хавфсизликка ҳам таъсир қилиши мумкин: “Ғазога гуманитар ёрдам жўнатиш тинчлик учун имконият бўлиши мумкин. Биз бунга ишонамиз. Шундай қилиб, бу халқаро барқарорликка ҳам ҳисса қўшади. Эҳтимол, ҳамма тинчликни хоҳлайди. Лекин нафақат хоҳлаш, балки ҳаракат қилиш, қадам ташлаш керак”.