Ҳусановнинг агенти Mirror нашрига Абдуқодирнинг атрофидаги вазият ҳақида гапирди
0
"Манчестер Сити" клуби "Ланс" ҳимоячиси Абдуқодир Ҳусановга қизиқаётгани ва у учун 20 млн евро тўламоқчи экани ҳақида хабарлар чиқди. ПСЖ, "Ньюкасл" ва "Тоттенхэм" клублари ҳам Ҳусанов учун курашишмоқда.
Абдуқодир Ҳусановга ўз хизматларини кўрсатувчи Football Group LLC раҳбари Гайрат Хасбиулин трансфер масаласида "Ланс" клуби Абдуқодирнинг йўлини тўсмаслиги ва орзудаги трансфер амалга ошишига тўғаноқ бўлмаслигини Mirror нашрига маълум қилди.
"Абдуқодир ўзининг позициясида Европадаги энг яхши ўйинчилардан бири эканлигини аллақачон исботлади. У ҳали ёш ва ҳар кун кучлироқ бўлиб бормоқда. Абдуқодир Европанинг энг яхши клубларида ўйнашга муносиб. "Ланс" билан алоқаларимиз жуда яхши, ҳозирда клуб билан бир тўлқиндамиз – биз ўйинчи учун энг яхшисини хоҳлаймиз. Агарда эҳтимолий трансфер амалга ошадиган бўлса, клуб ёш футболчига ўз вақтида ишонч билдиргани учун муносиб равишда катта мукофотга эга бўлади", - дейди Гайрат Хасбиулин.