Ўлимга ҳукм қилинган икки маҳбус Жо Байденнинг афвини рад этди

^{Фото: Reuters}
АҚШда ўлим жазосига ҳукм қилинган Шеннон Агофски ва Лен Дэвис мамлакат президенти Жо Байденнинг афвини рад этишди.

NBC телеканалининг хабар беришича, маҳкумлар ҳукмнинг енгиллаштирилиши “уларни ноқулай аҳволга солиб қўйишига” ишонишади, чунки улар ўзларига қўйилган айблов устидан шикоят қилишга уриниб, айбсиз эканликларини таъкидламоқда.

АҚШ судлари ўлим жазосига ҳукм қилинганкар иши бўйича апелляцияларни кучайтирилган текширув доирасида кўриб чиқишлари шарт. Бу эса ишларнинг хатолар бўйича янада синчковлик билан ўрганилишини кафолатлайди. Агофски ва Дэвис бу жараёндан воз кечишни истамасликларини айтишди.

“Судланувчи фаол суд муҳокамасида иштирок этаётган пайтда ҳукмни юмшатиш — уни кучайтирилган текширув кўринишидаги ҳимоядан маҳрум этиш демакдир. Бу судланувчини унинг апелляцияси бекор қилинишига олиб келадиган асосий адолатсизлик ҳолатига тушириб қўяди”, дейди Шеннон Агофски.

Ҳар иккала маҳбус ҳам ҳукмни енгиллаштиришни тақиқлаш тўғрисидаги аризаларида иккинчи адвокат тайинланишини талаб қилмоқда. АҚШ Олий судининг 1927 йилдаги қарорига кўра, президент маҳкумларнинг розилигисиз афв эълон қилиши мумкин.

Жо Байден 23 декабрь куни ўлим жазосига ҳукм қилинган 40 кишидан 37 нафарининг жазосини енгиллаштирган эди. У сайланган президент Дональд Трамп маъмуриятининг “қатл жазоларини қайта тиклашига” йўл қўя олмаслигини тушунтирди.

12 декабрь куни Байден 1,5 минг кишининг жазосини енгиллаштириб, зўравонликсиз жиноятлар учун айбланганлардан 39 нафар маҳкумни афв этган.