Элдор Шомуродов собиқ клубига қайтиши мумкин...

Ўзбекистон миллий терма жамоаси ҳужумчиси ва Римнинг “Рома” клуби аъзоси Элдор Шомуродовга италиялик “Кальяри” клуби қизиқиш билдирмоқда. Бу ҳақда “La Gazzetta dello Sport” нашри хабар берди.

Манбаларнинг маълум қилишича, Сардиния клуби яқин вақт ичида Шомуродовнинг трансфери бўйича “Рома” билан музокараларни бошлашни режалаштирмоқда. Агар Рим клуби январда янги ҳужумчини сотиб олса, Шомуродовнинг жамоани тарк этиши эҳтимоли юқори.

Шомуродов учун “Кальяри” бегона жамоа эмас. У 2023/24 йилги мавсумда айнан ушбу клуб сафида ўйнаб, 24 та ўйинда майдонга тушди. Бу ўйинларда 3 та гол ва бир нечта голли узатмалар амалга оширди.

Маълумотларга кўра, Элдор Шомуродов “Рома” сафида жами 62 та ўйинда қатнашиб, 8 та гол урган ва 7 та голли узатмага муаллифлик қилган. “Transfermarkt” портали унинг трансфер нархини 4 миллион еврога баҳоламоқда. Ҳужумчининг “Рома” билан амалдаги шартномаси 2026 йил ёзига қадар тузилган.

Қайд этиш жоиз, аввалроқ Элдор Шомуродовга “Эмполи” клуби томонидан жиддий қизиқиш билдирилаётгани ҳақида ҳам хабар қилинганди.

Унинг келгуси тақдири қандай бўлиши мухлислар учун қизиқарли бўлиб қолмоқда.