Франциялик шарҳловчи Ҳусановнинг "Сити"га трансфери ҳақида нималар деди?
Европанинг энг катта инсайдерлари ҳам 20 ёшли футболчининг "Сити"га ўтаётганини тасдиқлашди. Абдуқодирнинг трансфери 50 млн еврога баҳоланмоқда.
Гиви Жашининг айтишича, Абдуқодир Ҳусанов Франция чемпионатида ўзини кўрсатиб бўлди.
"Абдуқодир тўп учун курашда жуда кучли, курашларни яхши ҳис қилади, подкатларнинг масофасини тўғри ўлчайди. Франция чемпионатидаги ўйинлари орқали у яхши тажриба тўплаб олди. Лига 1 - жуда интенсив чемпионат, бу ерда тезлик ва кураш асосий ўринга чиқади. Ушбу мавсумда ҳакамлар курашларга кўпроқ қўйиб беришмоқда. Абдуқодир шундай курашларда фойдали ва йўқолиб қолмаяпти", - деди Жаши.
"Абдуқодирнинг "Сити"га ўтиши борасидаги хабарлар чиққанидан кейин мухлислар: "Тўп билан яхши ўйнай олмайдиган, яхши узатмалар бермайдиган ҳимоячи Гвардиолага нега керак?", дейишди. Абдуқодир "Ланс"даги вазифаси бундай эмасди, буни тушуниш керак. Бунинг учун "Ланс"да Томассон ва Сотока бор, улар пасни қабул қилиб олиш учун орқароққа ўтишади, марказий ҳимояда ҳам тўп билан яхши ўйнайдиган Дансо ва Франковски ҳам бор.
Унга ҳужумни бошлаш вазифаси қўйилмаган. Балки, "Сити" ҳам ўзидаги Родрини вазифасини бажарадиган футболчи қидираётгандир. "Манчестер Сити" қарши ҳужумларни қабул қилиб оладиган вақтларда Родри марказий ҳимояни ёпиб беради, чунки у тўп учун курашда жуда фойдали. Ҳусанов ҳам гавдали футболчи, тезлик ва тўп учун курашда яхши. Шунингдек, Гвардиола у орқали Гвардиолнинг вазифасини ҳам юклаши мумкин: ҳужумга қўшилиб туриш", - деди Жаши.
Шарҳловчининг фикрича, Ҳусанов АПЛга мослашишда қийналмайди.
"У Франция шимолидаги "Ланс" жамоасида ўйнади. Шаҳар унчалик катта эмас, 20 мингча аҳоли яшайди. Лансда бўлганимда бир нарсага аҳамият берганман, у ерлар Франция эмас, кўпроқ Британия шаҳрига ўхшайди. Шаҳарда қизил ғиштдан қурилган уйлар кўп, қўшнилар бир-бирини яхши танишади. Манчестер шаҳри ҳам деярли шундай шаҳар. Менимча, у Манчестерга кўчиб борса, ҳайратга тушмаса керак, чунки Ҳусанов Лансда бундай ҳолатларни кўрган. Абдуқодир Франция чемпионатида кўп ўйин ўтказди ва мухлислар: "Бу футболчи ким?", деб савол беришмайди. Майдондаги босиқлик, қаттиққўллик, эҳтиёткорлик борасида Лоран Бланга ўхшайди", - деди Жаши.
Манба: championat.asia