Air Astana авиакомпанияси судда 12 ёшли йўловчига ютқазди

Air Astana авиакомпанияси апелляция судида россиялик 12 ёшли йўловчи Зера Галиевага ютқазди. Қиз авиакомпаниянинг эътиборсизлиги туфайли бир ўзи ёлғиз Остона аэропортида қолиб кетганди. Бу ҳақда Қозоғистон ОАВ хабар бермоқда.

Қайд этилишича, 2024 йил 20 июль куни 12 ёшли эгизак қизлар Зере ва Зауре Галиевалар Остонада тўхташ билан АҚШдан Уралскка қайтаётган эди. Бироқ парвозга рўйхатдан ўтиш пайтида FlyArystan авиакомпанияси (Air Astana шўъба корхонаси) ходимлари опа-сингиллардан фақат биттасини рўйхатдан ўтказган. Натижада бортга чиқиш талонисиз қолган Зере самолётга қўйилмади. Муаммони ҳал қилишга ваъда берган FlyArystan ходимлари болани Остона аэропортида бир ўзини қолдириб кетишди.

Қиз фақатгина эртаси куни катталар ҳамроҳлигисиз Уралскка учиб кета олди.

Суд мурожаатни кўриб чиқиш чоғида Air Astana вакиллари ўз айбини тан олди, бироқ қизнинг онасидан маънавий зарар учун тўланадиган товон пулини 5 миллион тенгедан (тахминан 10,5 минг доллар) 1,5 миллионгача камайтиришни сўради. Суд авиакомпаниянинг бу илтимосини рад этди.