Россия суди Googleʼни 8 млрд рубл жаримага тортди
0
Москва суди АҚШнинг Google компаниясини белгиланган маъмурий жазони бажаришдан бўйин товлагани учун 8 миллиард рубл миқдорида жаримага тортди. Бу ҳақда Москва умумий юрисдикция судлари матбуот хизмати хабар берди.
«Пойтахт суди Google LLC ни маъмурий ҳуқуқбузарликни содир этганликда айбдор деб топди. Москва шаҳри Нагорний тумани 235-сонли суд участкаси судясининг қарори билан Google LLC га 8 миллиард рубл миқдорида жарима белгиланди», — дейилади хабарда.
Қайд этилишича, ишни Москванинг Чертаново туман суди кўриб чиққан. Судда айнан қайси ҳолат бўйича иш кўриб чиқилганига ойдинлик киритилмаган.
2024 йилнинг октябр охирларида Россия суди YouTube видеохостингида маҳаллий телеканалларнинг аккаунтлари тиклаб берилиши борасидаги талаблари бажарилмагани учун Googleʼни 2 ундециллион рубл (2 рақамидан кейин 36 та нол бор) жаримага тортганди.
2023 йил декабрда Москванинг Таганка суди Google компаниясига Россияда тақиқланган маълумотларни ўз ичига олган материалларни YouTubeʼдан олиб ташламагани учун 4,6 миллиард рубл жарима белгилаган эди. Шунингдек, Америка компанияси 2022 йилда 21,07 миллиард рубл, 2021 йилда эса 7,2 миллиард рубл жаримага тортилган.