Дунёдаги энг хавфсиз 5 та автомобил номи эълон қилинди

Euro NCAP ташкилоти ўтказган краш-тестлар натижаларига мувофиқ 2024 йилнинг энг хавфсиз енгил автомобиллари аниқланди, деб хабар бермоқда Motor.

“Энг хавфсиз электромобил” номинациясида Zeekr X кроссовери ғолиб чиқди. Бундан ташқари, ушбу модел кичик кроссоверлар синфидаги энг яхши автомобил сифатида тан олинди.

^{Фото: Euro NCAP}
Ташкилот Mazda CX-80 моделини энг хавфсиз йирик кроссовер сифатида эътироф этди. Катта оилавий автомобиллар рейтингида Skoda Superb етакчиликни қўлга киритди. Мутахассислар, шунингдек, Хитойнинг Maxus eTerron 9 русумли автомобили юқори даражада хавфсиз эканини алоҳида таъкидлади.

Тоифалардан қатъи назар, Mercedes-Benz E-Class мутлақ ғолиб деб топилди.

Euro NCAP — автомобилларнинг фаол ва пассив хавфсизлигини баҳолаб, мустақил тарзда краш-тестлар ўтказадиган Европа ташкилотидир.

Аввалроқ Aito М9 кроссовери Хитойнинг энг хавфсиз автомобили сифатида тан олинганди.

C-NCAP услуби бўйича ўтказилган синовда ушбу автомобил хавфсизлик бўйича 93,9 балл тўплаган. Аito М9 моделида ҳайдовчи ва катта ёшли йўловчилар хавфсизлиги 96,98 фоиз даражада баҳоланди. Пиёдалар хавфсизлиги 75,38 фоизни ташкил этди, фаол хавфсизлик тизимларининг самарадорлиги эса 97,79 фоиз деб топилди.

Renault Logan автомобили эса Жанубий Американинг Latin NCAP ташкилоти томонидан ташкил этилган краш-тестдан ўта олмаган. Синов якунида машина хавфсизлик учун бериладиган бешта юлдуздан нол олган.

Хусусан, унда ҳайдовчи ва катта ёшли йўловчиларнинг хавфсизлиги 32,8 фоиз, болаларники 61,2 фоиз, пиёдаларники эса 46,3 фоиз деб баҳоланган. Фаол хавфсизлик тизимларининг ишлаши 0 га тенг бўлган. Бундан ташқари, ён томондан зарба берилганда кузов юкламага бардош бера олмаган.