Дональд Трамп ўз криптовалютасини ишга туширди
0
$TRUMP (Official Trump) криптовалютасининг нархи бир суткадан камроқ вақт ичида 578 фоизга кўтарилиб, савдоларнинг умумий ҳажми 10 миллиард доллардан ошди. У ишга туширилганида 4,29 доллар даражасида сотилаётганди.
$TRUMP тангаси Solana (SOL) блокчейнида ишлаб чиқилган. Мемкоин эмблемасида Трамп курашга чақириқни ифодаловчи қўлни кўтарган ҳолда тасвирланган. Бу 2024 йил июль ойида АҚШнинг собиқ президентига суиқасд уюштирилган воқеаларга ишора.
Криптовалюта ишга туширилган пайтда 200 миллион танга муомалага кирган. Бироқ ишлаб чиқувчилар уч йил ичида токенларнинг умумий сонини 1 миллиардга етказишни режалаштирмоқда, дейди Тhе Crypto Times портали.
Мемкоин (memecoin) — бу аслида ҳеч қандай фундаментал қийматга эга бўлмаган ва фақат ҳазил ёки интернет мемлари асосида яратилган криптовалютадир. Унинг курси ўсиши орқали фойда олишни мақсад қилганлар уни сотиб олади. Мемкоинлар кўпинча интернетдаги ҳазил ёки машҳур воқеаларга боғланган бўлади.
Мемкоиннинг энг машҳур намунаси Догеcоин бўлиб, у дастлаб биткоинни пародия қилувчи ҳазил сифатида яратилган. Криптовалютанинг рамзи Шибу Ину зотли ит ҳисобланади.
2024 йилда мемкоинлар криптобозорнинг энг тез ривожланаётган секторига айланди ва йил бошидан бери уларнинг умумий капиталлашуви 1800 фоиздан зиёдга ўсди. Трамп бир неча марта криптовалюталарни қўллаб-қувватлаб келган.
У криптовалютани миллий устуворлик сифатида эълон қилувчи фармонни имзолашни режалаштирмоқда. Фармонга барча давлат идоралари учун рақамли активларга нисбатан сиёсатни қайта кўриб чиқиш ва, эҳтимол, криптовалюталар билан боғлиқ барча суд жараёнларини тўхтатиб қўйиш тўғрисидаги кўрсатмани киритиш масаласи муҳокама қилинмоқда.