Сурхондарёда директор ўринбосари ўқувчига нисбатан жинсий зўравонликда айбланмоқда

Сурхондарё вилояти, Денов туманидаги мактаблардан бирида директор ўринбосари 9-синф ўқувчисига бир йил давомида жинсий зўравонлик қилгани маълум бўлди. Болалар омбудсмани ушбу жиноят юзасидан иш қўзғатилганини тасдиқлади ва тергов жараёни мониторинги ҳақида маълумот берди.

Kun.uz хабарига кўра, директор ўринбосари ўқувчини қўрқитиш орқали жиноят содир этган. Ўқувчининг ота-онаси 2024-йил сентябрида бу воқеадан хабар топиб, ҳуқуқ-тартибот органларига мурожаат қилган. Шундан сўнг, ички ишлар органлари билан ҳамкорликда тергов ишлари бошланди ва гумонланувчи ҳибсга олинди.

Болалар ҳуқуқлари бўйича вакил девони маълум қилишича, тергов жараёнида боланинг манфаатлари ҳимоя қилинмоқда ва тафсилотлар ошкор қилинмаяпти. Иш ҳозирда судга ўтказилган бўлиб, суд мажлиси ёпиқ эшиклар ортида ўтказилиши кутилаяпти.