Ҳусановни қайси клуб "илиб кетиш"га яқин эди ёхуд “Сити” трансферига тўсқинлик қилган клуб...
0
Аслида жорий мавсум давомида 20 ёшли ўзбек ҳимоячиси Европанинг кучли бешлик чемпионатларининг ўзидан йигирмага яқин клублар эътиборини тортди. Хусусан, Англия Премьер-лигасининг ўзидан ўндан зиёд клуб легионеримизга даъвогарлик қилди. Бироқ улар ўйинчини олиш учун “Манчестер Сити”га рақобат қила олмади.
Нуфузли манбалар бу трансферга оид қизиқарли маълумотларни тўплаб, футбол ишқибозларига етказиш учун ўзбек футболчиси атрофидаги мутахассислардан турли ахборотларни олишга уриняпти.
Sports.uz портали Абдуқодирнинг манфаатларини ҳимоя қилаётган футбол агенти Гайрат Хасбиуллиннинг хориж манбаларига берган интервьюларидан олинган қизиқарли маълумотларни ўзбекистонлик футбол ишқибозлари эътиборига ҳавола этади.
- Бизга айтишларича, “Манчестер Сити” чемпионликка эришган жамоани қайта қуришни бошлади. Бош мураббий Хосеп Гвардиола ўз фаолиятида илк бор шундай қилмоқда. Ёш ва тезкор марказий ҳимоячиларнинг трансфери айнан мана шу мақсад билан боғлиқ.
Футболчилардан кимлардир талаб қилинаётган тезкорлик кўрсата олмаяпти, Диаш эса кўп жароҳат оляпти. Гвардиола энг истиқболли икки марказий ҳимоячини олиш учун “ов”га чиқишига тўғри келди. Биз бош мураббий Ҳусановга қизиқаётганини тушуниб тургандик.
– Ҳусановни илиб кетишга қайси клуб яқин келганди?
– “Ньюкасл” трансферни амалга оширишга яқин келганди. Охиригача фаворитлардан бири бўлиб турди, бироқ охири ўйинчи учун “Манчестер Сити” билан рақобат пойгасидан чиқиб кетди.
Тушунишимча, бу масалага ҳам молиявий фэйр-плей таъсир ўтказди. Қолаверса, уларга трансферни амалга ошириш учун вақт ҳам камлик қилди.
Агар улар таклифни эртароқ берганида, балки келишувга эришган бўлармиди?!
Кейинроқ “Манчестер Сити” трансфер бўйича “Ланс”га шундай босим қилдики, уларга қарши турадиган таклиф бериш жуда оғир масала бўлиб қолди.
Таъкидлаш жоизки, аслида “Ланс” қишки трансферлар вақтида Абдуқодир Ҳусановни 25-30 миллион еврога трансфер қилишни мўлжаллаган эди. Лекин мавсум бошидан бери барқарор ўйин намойиш қилган ўзбек легионерининг харидорлари кўпайиб кетди.
“Манчестер Сити” кутилмаганда бу трансфер учун жами 40 миллион евро бадал пули ва қўшимчасига 10 миллион евро миқдорида бонус таклиф қилиш орқали, барча рақобатчиларини ортда қолдирди.
Англия чемпионлари Ўзбекистон миллий терма жамоаси марказий ҳимоячиси билан 4,5 йиллик шартнома имзолади. Томонлар истагига кўра, ҳамкорлик яна бир йилга узайтирилиши мумкин.
Абдуқодир Ҳусанов янги жамоасида 45-рақамни танлади. Ҳамюртимиз Манчестерда машғулотларни бошлаб юборган. Энди ҳамма Англия чемпионатидаги биринчи ўзбек футболчисининг дебютини кутмоқда.