Коня шаҳрида тўрт қаватли бино қулаб тушди: тергов бошланди

^{Фото: газета Yeni Şafak}
24-январ куни Туркиянинг Коня шаҳрида тўрт қаватли турар жой биноси қулаб тушди. Қутқарувчилар харобалар ичида қолиб кетган 3 кишини тирик ҳолда олиб чиқишди, шунингдек, 2 кишининг жасади топилди. Коня прокуратураси воқеа юзасидан тергов бошлади ва ишга алоқадорликда гумон қилиниб 4 киши ҳибсга олинди.

^{Фото: Ижтимоий тармоқлар}
Дастлабки маълумотларга кўра, фалокат тунги вақтда Селчуклу тумани марказида юз берган. Коня мери Иброҳим Алтай биноларнинг жуда эски бўлганини таъкидлаб, ҳодиса сабаблари ҳақида аниқ маълумот йўқлигини айтди.

Воқеа жойига зудлик билан фавқулодда хизматлар, қутқарувчилар ва полиция етиб келган. Харобалар остида қолган деб тахмин қилинган 5 кишидан 3 нафари тирик ҳолда қутқарилган, қолган 2 киши (эркак ва аёл)нинг жасадлари топилган.

^{Фото: Ижтимоий тармоқлар}
Коня прокуратураси тергов давомида 4 кишининг қўлга олинганини маълум қилди.

«Тергов давомида воқеага алоқадорликда гумон қилиниб 4 киши ҳибсга олинди. Айни вақтда воқеа жойида прокуратура бошчилигида экспертлар комиссияси билан ҳамкорликда синчковлик билан тергов-суриштирув ишлари олиб борилмоқда», — дейилади Yeni Safak нашри келтирган баёнотда.

^{Фото: Ижтимоий тармоқлар}
Шунингдек, ижтимоий тармоқларда Коня шаҳридаги фалокатда суриялик йигитнинг кўпчиликни қутқаргани ҳақида видеолар тарқалди. Маълум бўлишича, ҳодиса вақтида йигит ҳар бир хонадон эшигини тақиллатиб, одамларни огоҳлантириб чиққан.