Доналд Трамп Исроилга Жо Байден томонидан қўйилган тақиқни бекор қилди

АҚШ президенти Доналд Трамп америкалик ҳарбийларга Исроилга 2000 фунтлик бомба етказиб бериш бўйича аввалги президент Жо Байден жорий қилган тақиқни бекор қилишни буюрди. Бу ҳақда Оқ уйдаги манба Reuters агентлигига маълум қилди.

Axios нашрининг хабар беришича, АҚШнинг янги маъмурияти шанба куни Исроилга 2000 фунт (тахминан 907 килограмм) оғирликдаги бомбалар етказиб бериш чекловларини олиб ташлашга қарор қилган.

Reutersнинг таъкидлашича, бундай қадам кутилган эди. Байден ўтган баҳорда Исроил томонидан уруш вақтида бомбалар тинч аҳолига, айниқса Ғазо секторидаги Рафаҳга қарши қўлланиши мумкинлигидан хавотирга тушиб, етказиб беришни тўхтатган эди.

Ҳозирги вақтда Исроил ва ҲАМАС ўт очишни тўхтатиш бўйича келишувга эришди. Шунингдек, 25 январ куни исроиллик гаровга олинганлар фаластинлик маҳбусларга иккинчи бор алмашилди.

"Исроил томонидан буюртма қилинган ва тўланган, аммо Байден томонидан жўнатилмаган кўплаб нарсалар ҳозир йўлда!" – деб ёзди Трамп Truth Social платформасида, бу сўзлар ортида нимани назарда тутганини аниқлаштирмасдан.

Axios манбаларига кўра, 2000 фунтлик бомбалар яқин кунларда Исроилга етказилади.

Эслатиб ўтамиз, ҳам Трамп, ҳам Байден ўз сиёсатларида Исроилни қўллаб-қувватловчи позицияда туради.