Perplexity Assistant: Android учун янги сунъий интеллект ёрдамчиси ишга туширилди

Perplexity компанияси сунъий интеллектга асосланган янги Perplexity Assistant ёрдамчисини Android қурилмалари учун ишга туширди. Бу восита фойдаланувчиларнинг кундалик ҳаётини осонлаштириш учун кенг кўламли вазифаларни бажаришга мўлжалланган.

Perplexity Assistant фойдаланувчиларга саволларга жавоб беришдан тортиб, кечки овқат учун жой банд қилиш, эслатмалар ўрнатиш, электрон почта хабарларини ёзишгача ёрдам бериши мумкин. Шунингдек, у қурилманинг камерасидан фойдаланган ҳолда атрофдаги объектларни аниқлаш каби қизиқарли вазифаларни ҳам бажаради.

Компания раҳбари Аравинд Сриивас X платформасида ёрдамчининг имкониятларини кўрсатиб, унинг фойдаланувчи ниятларини тушуниш ва турли вазифаларни бажариш қобилиятига эга эканлигини таъкидлади. Ҳозирда ёрдамчи барча керакли илова ва хизматлар билан тўлиқ интеграция қилинмаган. Масалан, OpenTable’да рўйхатга олинмаган ресторанларни банд қилиш ҳали имконсиз.

Perplexity ўз ёрдамчисини янада такомиллаштириш устида ишламоқда. Яқин орада Perplexity Assistant Gmail ва Календар ҳисобларидаги маълумотларни ўқиш, электрон почта хабарларини умумлаштириш ва учрашувлар ҳақида хабарномалар тақдим қилиш имкониятига эга бўлади.

Бу восита барча фойдаланувчилар учун бепул бўлиб, Perplexity AI иловасини юклаб олиш ва уни стандарт ёрдамчи сифатида ўрнатиш орқали фойдаланиш мумкин. Google Assistant каби, Perplexity Assistant қурилмада қувват тугмасини бир неча сония босиб туриш орқали фаоллаштирилади.