Миср Ғазо аҳолисини кўчириш бўйича АҚШга муқобил режа таклиф қилмоқчи
0
Миср президенти Дональд Трампнинг Ғазо аҳолисини анклавдан ташқарига кўчириш ва ҳудудни сайёҳлик масканига айлантириш таклифига қатъий қарши эканини билдирган. Қоҳира бундай ҳаракат Исроил билан 1979 йилда имзоланган тинчлик шартномасига зарар етказиши мумкинлигидан огоҳлантирган.
Қочқинлар хавфи ва Мисрнинг позицияси
Миср ҳукумати ҲАМАС аъзоларининг мамлакат ҳудудига кириб келиш эҳтимолидан хавотирда. Чунки бу Синай ярим оролини Исроилга қарши янги можаролар учун ҳарбий таянч нуқтасига айлантириши мумкин.
AP манбаларига кўра, Миср Ғазо аҳолисининг тарқалиб кетишининг олдини олиш учун дипломатик кампания бошлаган. Қоҳира Трамп маъмуриятига бу ташаббус Миср-Исроил тинчлик келишувига путур етказиши мумкинлигини маълум қилган. Бу борада Пентагон, Давлат департаменти ва Конгрессга махсус мактублар юборилган. Шунингдек, Исроил ҳукумати ва Буюк Британия, Франция ҳамда Германия каби Ғарб давлатларига ҳам шунга ўхшаш сигнал берилган.
Мисрда сиёсий хавотирлар ва халқаро босим
Qatar’нинг The Middle East Eye нашри маълумотларига кўра, Трампнинг Ғазо бўйича таклифи Миср расмийларини ҳайратга солган. Ҳатто айрим расмийлар бундай режа мамлакат ичида сиёсий беқарорлик ва ҳатто эҳтимолий тўнтариш хавфини келтириб чиқариши мумкинлиги ҳақида очиқ гапира бошлаган.
2023 йил 7 октябрда Исроил ва ҲАМАС ўртасида кескин тўқнашувлар бошланган пайтдаёқ Қоҳирага Ғазо қочқинларини қабул қилиш таклифи берилган эди. Аммо бу масала очиқ муҳокама қилинмаган.
Бунинг фонида Al-Araby Al-Jadeed портали маълумотларига кўра, АҚШ ҳозирда Мисрга кучли дипломатик босим ўтказмоқда. Манбаларнинг фикрича, Миср раҳбарияти минтақа бўйича нуфузли ўйинчиларнинг қўллаб-қувватлаши бўлмасдан, Трампнинг ташаббусига қарши туришда жиддий қийинчиликларга дуч келиши мумкин.