Японияда анъанавий бекинмачоқ ўйини учун 100 нафар иштирокчи керак
0
Ўйин ўтказиладиган жой сифатида Ҳоккайдо префектурасининг Шакотан яриморолида жойлашган кичик Шакотан қишлоғи тепаликлари танланган. Қишлоқда қиш жуда совуқ ўтади — саноқли кунлардагина кундузи ҳарорат 1 даражага кўтарилади. Ҳудуднинг аксарият қисми доимий қалин қор остида бўлади. Қишлоқда атиги 2200 га яқин аҳоли истиқомат қилади.
Япония Бекинмачоқ ассоциацияси бу ўйинни тез-тез ўтказиб келади, масалан кузда ушбу ўйин Нагасакидаги кимсасиз оролда ташкиллаштирилган. Ўтган йили қишда ҳам бекинмачоқ қор остида ўтказилган.
Айни пайтда ташкилот 2025 йилги ўйинда қатнашишни истаган 100 нафар иштирокчини қидирмоқда. Бу йилги ўйин 23 февралга режалаштирилган, ўша куни ҳарорат -5-10 даражагача тушиши мумкин. Ассоциациядагилар таъкидлашича, иштирокчилар иссиқ кийимда бўлиши керак. 6 ёшдан ошган барча кўнгиллилар унда иштирок этиши мумкин, ўтган йили энг кекса иштирокчи 60 ёшда бўлган.
Ўйиннинг моҳияти яширинишдан иборат бўлса-да, иштирокчилар бўронда йўқолиб қолмаслиги учун баъзи эҳтиёт чоралари кўрилган.
Ўйинда қатнашиш учун чипта сотиб олиш керак. Одамларни қидиришга аввалги бекинмачоқ ўйинларида ғолиб бўлганлар, Антарктикада тажриба орттирган тадқиқотчилар ва Япония ўзини ўзи мудофаа қилиш кучлари ходимлари жалб қилинади.
Ўйин шартлари одатий бекинмачоқдан бироз фарқ қилади. Унда иштирокчилар узоқ вақт яшириниши керак эмас, балки ўйин бошланганидан кейин уч дақиқа ичида қидирувчиларга кўринмай базага қайтиб кела олиши керак. Ўйин бир неча раундлардан иборат бўлади.
Тадбир 12:45 дан 16:00 гача давом этади. Иштирокчилар туш пайтида маҳаллий жамоат марказида тўпланади, сўнг биргаликда ўйин ўтказиладиган жойга боради. Оддий чипталар катталар учун 3000 иена (19 доллар), болалар учун 1500 иена туради. Бундан ташқари, ёшидан қатъи назар, хоҳловчиларга 15000 иеналик 16 та чипта ҳам мавжуд. У ётоқхонада тунаш, маҳаллий иссиқ булоқ ва саунадан фойдаланиш ҳамда зиёфатни ўз ичига олади. Чипталарни ушбу сайтда онлайн буюртма қилиш мумкин.